Tags-Aansoo

maiñ shā.erī ke huuñ fann-e-arūz se vāqif
zabar haiñ zer haiñ eraab haiñ mire aañsū

maiñ pī rahī huuñ ki zahrāb haiñ mire aañsū
tirī nazar meñ faqat aab haiñ mire aañsū

sahīfa jaan ke āñkhoñ ko paḌh rahā hai koī
ye rasm-e-ijrā ko betāb haiñ mire aañsū

ye aañsū kasm-pursī kis ke mātam meñ bahātī hai
janāza aaj kis kā kūcha-e-qātil se uThtā hai

uThtā hai 'dānish' dil se dhuāñ āñkhoñ se Tapakte haiñ aañsū
kyā ātish-e-ġham dene lagī lau kyā dil kā phaphūlā phuuT gayā

is bastī meñ kaun hamāre aañsū poñchhegā
jo miltā hai us kā dāman bhīgā lagtā hai

ujālā mahfiloñ meñ kar ke bhī aañsū hī haath aa.e
na raas aa.ī kabhī ḳhud sham.a ko bhī raushnī apnī

silsila rone kā sadiyoñ se chalā aatā hai
koī aañsū mirī palkoñ pe Thahartā hī nahīñ

aañsū huuñ hañs rahā huuñ shagūfoñ ke darmiyāñ
shabnam huuñ jal rahā huuñ sharāroñ ke shahr meñ

tash.hīr-e-dil-giriftagī-e-husn ho ga.ī
aañsū chhalak ke chashm-e-pashemāñ meñ aa ga.e

tasvīr banī dekhī ik jān-e-tamannā kī
aañsū mirī āñkhoñ meñ kyā silsila-vār aa.e

gila dil-e-saḳhtī-e-ahbāb kā gar maiñ bayāñ kartā
sadaf sā pal meñ aañsū uqda-e-dil ke ravāñ kartā

laḳht-e-dil yāqūt meñ aañsū haiñ motī āb-dār
aao dekho jauharī bāzār āñkheñ ho ga.iiñ

mirī palkoñ pe raushan haiñ jo aañsū
mujhe ai dīda-e-pur-nam bahut haiñ

jaane kyuuñ āñkhoñ meñ aate haiñ simaT kar aañsū
sochtā huuñ kahīñ gardish meñ sitāra to na thā

qissa-e-dil likh chuke 'mānī' bas ab
ḳhuuñ ke aañsū zeb-e-unvāñ kījiye

husn ne apnī jafāoñ pe bahā.e aañsū
ishq ko apnī shikāyāt pe ronā aayā

sunte haiñ ek dard to uThtā hai bār-bār
us kī ḳhabar nahīñ hai ki aañsū ravāñ haiñ kyuuñ

bichhaḌte vaqt aañsū rok lenā
tum apne aap ko rusvā na karnā

aañsū sitāre os ke daane safed phuul
sab mere ġham-gusār sar-e-shām ā.eñge