Tags-Aansoo

aañsū jo rukā vo kisht-e-jāñ meñ
bārish kī misāl aa gayā hai

shabbīr kā ġham ye jis ke dil par hogā
aañsū jo giregā shakl-e-gauhar hogā

ġham-e-yār bhī abr-e-naisāñ hai ai 'bahr'
jo Tapkeñge aañsū guhar rol leñge

bār-hā ḳhush ho rahe haiñ kyuuñ inhī bātoñ pe log
bār-hā jin pe unheñ aañsū bahāne chāhiyeñ

tham rahe aañsū rahī dil meñ jalan
nam rahīñ āñkheñ kaleja tar rahā

chaman chaman kahīñ aañsū ghuTā ghuTā kahīñ aah
banā rahā hai na.ī kā.enāt ishq-e-tabāh

un kī yaad meñ bahte aañsū ḳhushk agar ho jā.eñge
saat samundar apnī ḳhālī ā.ankhoñ meñ bhar lā.ūñgā

kahnā yādoñ ke barf-zāroñ se
ek aañsū bahā bahā tanhā

vo bhī to ro.eñ ai asar-e-giryā ek din
jin kī nigāh meñ mire aañsū haqīr haiñ

ek aañsū aur vo bhī sarf-e-zabt
kyā yahī ummīd kā anjām hai

āḳhirash rishta to ham meñ ik ḳhushī ik ġham kā thā
muskurāte jā.iye aañsū bahāte jā.iye

vīrāniyāñ ki āñkhoñ meñ sahrā basā huā
majbūri-e-hayāt na aañsū bhī muskurā.eñ

terī mahfil meñ sitāre koī jugnū laayā
maiñ vo pāgal ki faqat aañkh meñ aañsū laayā

DhūñDhe hai to palkoñ pe chamakne ke bahāne
aañsū ko mirī aañkh meñ aanā nahīñ aatā

tanhā tanhā dukh jheleñge mahfil mahfil gā.eñge
jab tak aañsū paas raheñge tab tak giit sunā.eñge

ḳhushī āñkhoñ meñ aañsū khīñchtī hai
samajh lo dil dukhoñ se bhar gayā hai

ik lahza bahe aañsū ik lahza hañsī aa.ī
sīkhe haiñ na.e dil ne andāz-e-shakebā.ī

abhī ik ḳhvāb maiñ ne jāgte meñ aise hai dekhā
mirā aañsū tire ruḳhsār par rakkhā huā hai

kyā dukh hai samundar ko batā bhī nahīñ saktā
aañsū kī tarah aañkh tak aa bhī nahīñ saktā

rūdād-e-ġham-e-ulfat un se ham kyā kahte kyūñkar kahte
ik harf na niklā hoñToñ se aur aañkh meñ aañsū aa bhī ga.e