Tags-Aansoo

kuchh bhī ho 'riyāz' aañkh meñ aañsū nahīñ aate
mujh ko to kisī baat kā ab ġham nahīñ hotā

nikal kar aañkh se ġhā.eb nahīñ hote haiñ ye aañsū
isī paanī se bhartā umr kā paimāna aatā hai

phir kisī kī yaad kyuuñ aatī hai yārab ḳhair ho
maiñ to aañsū poñchh kar ḳhush thā ki ronā ho gayā

kaan meñ hai tere motī āb-dār
yā kisī āshiq kā aañsū bolnā

agar ḳhushī meñ tujhe gungunāte lagte haiñ
to log shahr se aañsū bahāne lagte haiñ

jo phuul jhaḌ ga.e the jo aañsū bikhar ga.e
ḳhāk-e-chaman se un kā patā pūchhtā rahā

maiñ kabhī royā to vo bole Duboyā nām-e-ishq
aur agar aañsū pī liye to dil meñ dariyā bhar gayā

na poñchho mere aañsū tum na poñchho
kahegā koī tum ko ḳhosha-chīñ hai

mare jis par na chaar aañsū bahā.e us ne murde par
huā sābit ki paanī bah gayā chashm-e-muravvat kā

tirā dil to nahīñ dil kī lagī huuñ
tire dāman pe aañsū kī namī huuñ

gar naam kamānā hai tumheñ itnā samajh lo
aañsū bhī mohabbat kī nishānī kī tarah haiñ

biit gayā sāvan kā mahīna mausam ne nazreñ badlīñ
lekin in pyāsī āñkhoñ se ab tak aañsū bahte haiñ

na zahr-e-ḳhand laboñ par, na aañkh meñ aañsū
na zaḳhm-hā-e-darūñ ko hai justujū-e-ma.āl

laboñ pe narm tabassum rachā ke dhul jaa.eñ
ḳhudā kare mire aañsū kisī ke kaam aa.eñ

maiñ jhuuT sach bhī yak-dam aañsū na un ke poñchhe
jo chashm roz-o-shab haiñ ḳhūñ-bār terī ḳhātir

dard baḌhtā gayā jitne darmāñ kiye pyaas baḌhtī ga.ī jitne aañsū piye
aur jab dāman-e-zabt chhuTne lagā ham ne ḳhvāboñ ke jhūTe sahāre liye

pī to luuñ āñkhoñ meñ umDe hue aañsū lekin
dil pe qaabū bhī to ho zabt kā yaarā bhī to ho

shabnamī sub.h meñ māhaul ko mahkāte haiñ
ġhuncha-o-gul kī tarah haiñ ye nikharte aañsū

jab bhī rātoñ ko tirī yaad kabhī aatī hai
sard aahoñ se haiñ āñkhoñ ko ye bharte aañsū

zindagānī ke ka.ī rañg dikhāte haiñ ye
kyā kahūñ kyā haiñ ye palkoñ pe Thaharte aañsū