Tags-Aansoo

ek aañsū meñ hue ġharq do-ālam ke sitam
ye samundar to tire ġham se bhī gahrā dekhā

ḳhushī kī kasrat agar ho un ko to ban ke āñkhoñ meñ aa.eñ aañsū
ziyāda yaañ tak haiñ apnī had se na Thahre aariz meñ āb-e-āriz

do chaar ghaḌī hañs-bol ke ham barsoñ ḳhuuñ ke aañsū rote
do chaar ghaḌī bhī bazm-e-tarab meñ jī na lagā achchhā hī huā

aañsū the is qadar mirī chashm-e-malāl meñ
har gosha gosha shahr kā ashkoñ se bhar gayā

milī rone se jab fursat to aañsū pī liye ham ne
mohabbat ke liye goyā bharam yuuñ bhī hai aur yuuñ bhī

jab tak nishān puḳhta nahīñ ho jaatā
aañsū nahīñ kahlātā

patthar nahīñ āñkheñ to ye aañsū haiñ baḌī chiiz
bhīge hue phūloñ kī tarah aur nikhar jā

bahā de aaj kuchh aañsū ki phir ġhanīmat haiñ
chaḌhā hai aaj jo dariyā vo kal utar hī na jaa.e

ek aañsū huuñ chashm-e-ishrat kā
ziist kā rañj-e-shādmānī huuñ

ik tabassum hazār-hā aañsū
ibtidā vo thī intihā hai ye

qasam hai ye tum ko na aañsū bahānā
kabhī yaad aa.e jo tum ko hamārī

farq ye hai nutq ke sāñche meñ Dhal saktā nahīñ
varna jo aañsū hai durr-e-shāh-vār-e-naġhma hai

hamārī mayyat pe tum jo aanā to chaar aañsū bahā ke jaanā
zarā rahe pās-e-ābrū bhī kahīñ hamārī hañsī na karnā

tumhārī yaad meñ koī javāb hī na diyā
mere ḳhayāl hī aañsū rahe sadā de kar

ek pattā girā
tū ne aañsū bharī tund gaalī se jis kā svāgat kiyā

ḳhushiyāñ chalā huuñ bāñTne aañsū sameT kar
uljhan hai mere sāmne haqdār kaun hai

kahāñ nikal sake aañsū nazar ko jaa.e nahīñ
rakhā huuñ shakl ko terī maiñ daab āñkhoñ meñ

is liye dil ke talab karne pe maiñ rotā huuñ
tar na ho aap kā dāman ki ye ik aañsū hai

qahqahe chhīn ke aañsū mujhe dene vaale
maiñ ne tujh ko bhī rulāyā ho kabhī yaad nahīñ

phir kisī kī yaad aa.ī phir hue aañsū ravāñ
phir sitāroñ kī chamak dil par garāñ hone lagī