Tags-Aansoo

bas ai sham.a kar fikr apnī zarā
inhī chaar aañsū pe itnā ghamanD

jaltī jaatī haiñ jaḌeñ sūkhte jaate haiñ shajar
ho jo taufīq to aañsū hī koī dam barsā

farzī hikāyatoñ pe na aañsū gañvāo tum
yaaro kabhī maiñ apnī kahānī sunā.ūñgā

ye tirī yādoñ ke jugnū yā ki aañsū haiñ mire
jo sitāre se chamakte haiñ mirī poshāk par

hamāre aañsū sunā rahe haiñ shikasta dil kā fasāna un ko
magar qayāmat kī baat hai ye vo sun ke bhī muskurā rahe haiñ

maiñ kisī aañkh se chhalkā huā aañsū huuñ 'nabīl'
merī tā.īd hī kyā merī baġhāvat kaisī

sirf mere nahīñ haiñ ye aañsū
in meñ hissa raqīb kā hai kuchh

abr kyā aañsū bahānā koī ham se siikh jaa.e
barq kyā hai tilmilānā koī ham se siikh jaa.e

ma.āz-allāh mirī āñkhoñ kā izhār-e-tañg-zarfī
Tapak paḌte haiñ aañsū jab tumhārā naam aatā hai

inhī hairat-zada āñkhoñ se dekhe haiñ vo aañsū bhī
jo aksar dhuup meñ mehnat kī peshānī se Dhalte haiñ

ai sitamgār qabr-e-āshiq par
chand aañsū tujhe bahānā thā

sahar kī aañkh se aañsū Tapak na jaa.eñ 'na.īm'
ye soch kar na bayāñ raat kā fasāna kiyā

ḳhvāb Takrā ke haqā.eq se hue sad-pāra
ab inheñ aañkh se Dhalke hue aañsū likhnā

din tirī yaad meñ Dhal jaatā hai aañsū kī tarah
raat taḌpātī hai ik nashtar-e-pahlū kī tarah

dil meñ phir ik kasak sī uThī muddatoñ ke ba.ad
ik umr ke ruke hue aañsū nikal paḌe

vo ḳhud apnā dāman baḌhāne lage
chalo aaj aañsū Thikāne lage

un ke pīchhe bhī koī ġham kā samundar hogā
varna aañsū na kabhī aañkh meñ khāre hote

sirf āñkhoñ hī meñ kam ruk na sake merī 'ra.īs'
mere aañsū kisī dāman meñ bhī kam Thahre haiñ

rone ko maiñ huuñ bārish-e-bārāñ ke muqābil
aañsū jo thame dīda-e-pur-nam to hañsī hai

dāman-e-dasht ne aañsū bhī na pūchhe afsos
maiñ ne ro ro ke lahū saikḌoñ maidān bhare