Tags-Aarzoo

sar meñ saudā hai na dil meñ aarzū kis se kahūñ
jalvateñ māñge hai tanhā.ī kise āvāz duuñ

mrs-besant ne is aarzū ko paalā hai
faqīr qaum ke haiñ aur ye raag maalā hai

har safar ik aarzū hai varna sair-e-dasht meñ
kis ko shahzādī milī hai kis ko shahzāda milā

tamāsha-gāh-e-duniyā meñ tamāshā.ī rahe ham bhī
sahar kī aarzū ham ne bhī kī thī jalva-e-shab tak

ye aarzū hai rahe vo qaa.em ki chārasāzī kā ab nahīñ ġham
ḳhalish jo mahsūs kar rahā thā jigar maiñ dard-e-jigar se pahle

na koī aarzū jis meñ ho vo ujḌā huā dil huuñ
ġharaz be-kār huuñ ik dam jalā dene ke qābil huuñ

nahīñ hotā hai koī kaam hargiz vaqt se pahle
umīd-o-ārzū meñ dil ko taḌpāne se kyā hāsil

ik mustaqil safar hai tirī aarzū mujhe
aur ḳhud ko tāza-dam bhī nahīñ kar sakūñgā maiñ

nahīñ dair o haram se kaam ham ulfat ke bande haiñ
vahī ka.aba hai apnā aarzū dil kī jahāñ nikle

raat bhar rotī rahī be-sūd sham-e-ārzū
jab sar-e-mahfil chalā aayā hai parvāna koī

terī ik aarzū ne logoñ ko
kis qadar uljhanoñ meñ Daalā hai

vahī va.ada hai vahī aarzū vahī apnī umr-e-tamām hai
vahī chashm hai vahī raah hai vahī sub.h hai vahī shaam hai

dekhā to dil ke sāmne sāyoñ ke jashn meñ
har aks-e-ārzū kā anokhā libās thā

le de ke ek sāya-e-dīvār-e-ārzū
detā hai rahravoñ ko sahārā kabhī kabhī

kisī ke aage misl-e-sāġhar ham
laate haiñ dast-e-ārzū saaqī

yak do jaam aur bhī de tū saaqī
na rahe dil meñ aarzū saaqī

kaun letā balā.eñ paikāñ kī
aarzū koī dil meñ thī hī nahīñ

dil kī har aarzū hai ḳhvābīda
ab na vo kaifiyat na soz na rañg

aarzū hai ki vo har baat ko ḳhud hī samjhe
dil meñ kyā kyā hai dikhānā bhī nahīñ chāhte ham

ye kam-baḳht ik jahān-e-ārzū hai
na ho koī hamārā dil ho ham huuñ