Tags-Aarzoo

matā-e-be-bahā hai dard-o-soz-e-ārzūmandī
maqām-e-bandagī de kar na luuñ shān-e-ḳhudāvandī

ye shahr-e-ārzū hai 'ġhaus' aisā
jahāñ hadd-e-nazar koī nahīñ hai

yahāñ kisī ko bhī kuchh hasb-e-ārzū na milā
kisī ko ham na mile aur ham ko tū na milā

tū marī zindagī kā partav hai
meñ tirī aarzū kā saayā huuñ

tamām umr isī aarzū meñ guzrī hai
tire mizāj ko parkhūñ koī ḳhitāb karūñ

na jā.egī dil se kabhī aarzū
ye buniyād hai āh-e-mohkam bahut

aah us kī be-niyāzī kī nazar
aarzū kyā phuul sī kumhlā ga.ī

gaḌhī hai aarzū zinda hai hasrat
kisī kā ghar hai dil madfan kisī kā

safar meñ hotī hai pahchān kaun kaisā hai
ye aarzū thī mire saath tū safar kartā

ba.ad marne ke le ke jā.ūñgī
aarzū apne āshiyāne kī

nashāt-e-ārzū kā aur kyā anjām likkhūñgā
use bhī ik-na-ik din hasrat-e-nākām likkhūñgā

sitam-shi.ār tirī aarzū pe kyā mauqūf
kisī ḳhalish kā gavāra nahīñ judā honā

jab tumhārī aarzū baaqī nahīñ
dil dhaḌaktā hai na jaane kis liye

kuchh mo'tabar nahīñ hai asvad ho yā ki marmar
in pattharoñ ke aage kyā aarzū kare hai

kuchh gardish-e-zamāna kuchh aarzū kare hai
baaqī jo bach rahe hai vo kaam tū kare hai

ba-sad aarzū jo vo aayā to ye hijāb-e-ishq se haal thā
ki hazāroñ dil meñ thiiñ hasrateñ aur uThānā aañkh muhāl thā

sho.ala-e-dil bujhā ke dekh liyā
aarzū ko miTā ke dekh liyā

aarzū hī aarzū meñ miT ga.e
aur shauq-e-āstāñ baaqī rahā

jism ke rāstoñ se guzar kar
mutma.in nafs kī aarzū meñ

chalte chalte unheñ dekhā thā sar-e-rāh kahīñ
aarzū un kī usī din se mire saat huī