Tags-Fasla

milte haiñ roz un se hasrat kī sarhadoñ par
rahtā hai phir bhī haa.il kyuuñ jaane fāsla sā

qurb kā zikr jab chalā hogā
darmiyāñ koī fāsla hogā

ek lamhe meñ kaTā hai muddatoñ kā fāsla
maiñ abhī aayā huuñ tasvīreñ purānī dekh kar

adam vajūd ke mā-bain fāsla hai bahut
ye fāsla hameñ ik roz tai to karnā hai

raushnī tak raushnī kā rāsta kah lījiye
raat ko shām-o-sahar kā fāsla kah lījiye

darmiyāñ fāsla nahīñ hotā
tū agar bevafā nahīñ hotā

tirī justujū ke sadqe ye khulā hai raaz mujh par
ki myān-e-dair-o-ka.aba koī fāsla nahīñ hai

bahut qarīb se kuchh bhī na dekh pāoge
ki dekhne ke liye fāsla zarūrī hai

jism o jaañ kā fāsla hai hāsil-e-gard-e-safar
justuju-e-zindagī terā patā kaise huī

ye āftāb se kah do ki fāsla rakkhe
tapish se barf kī dīvār gal bhī saktī hai

milo to aise añdheroñ ko bhī pata na lage
chalo to aise ke jismoñ meñ fāsla na lage

ḳhud-kalāmī kā ye silsila ḳhatm kar gosh-o-āvāz kā fāsla ḳhatm kar
ik ḳhamoshī hai phailī huī sar-basar kuchh suḳhan chāhiye darmiyāñ yā aḳhī

fāsloñ meñ rahā qurbatoñ kā gumāñ
qurbatoñ meñ kahīñ fāsla rah gayā

kyā ye mumkin hai ki un kā fāsla ho jaa.e kam
ḳhaak ke siine pe āḳhir kab talak ye bār-e-ġham

baḌe logoñ se milne meñ hamesha fāsla rakhnā
jahāñ dariyā samundar se milā dariyā nahīñ rahtā

bahut hī duur haiñ ham tum se lekin
diloñ meñ fāsla koī nahīñ hai

ret par ik nā-mukammal naqsh thā qurbat kā ḳhvāb
fāsla baḌhne ke 'akmal' sau bahāne ho ga.e

fāsla qurb kī saa.at meñ simaT saktā thā
sar jhukā thā to tirā dil bhī nigūñ honā thā

na jaane kab na raheñ ham hameñ ġhanīmat jaan
hayāt-o-maut meñ kuchh aisā fāsla bhī nahīñ

yaar tak pahuñchā diyā betābi-e-dil ne hameñ
ik taḌap meñ manziloñ kā fāsla jaatā rahā