Tags-Friendship

kisī tarah bhī zamāne ko bas meñ kar na sake
na dostī na hameñ raas dushmanī aa.ī

mirī dostī bhī ajiib thī vahī āshnā vahī ajnabī
kabhī phuul bā.is-e-zaḳhm thā kabhī sañg bhī the gulāb se

kaise kisī furāt se ho dostī mirī
maiñ tishna-lab husain tire qāfile meñ huuñ

ajab hī dushman se dostī kī ki shakl ab hai ye zindagī kī
laboñ pe chakkī hai jāñ-kanī kī paḌe haiñ behosh nīm-jāñ se

ho takmīl-e-havas jis dostī kā muntahā ai dil
mujhe vo rasm-o-rāh-e-āshiqī taklīf detī hai

dostī kī jab duhā.ī dī to sharq-o-ġharb se
haath meñ patthar liye yāroñ kā lashkar aa gayā

ab tark-e-dostī hī taqāzā hai vaqt kā
ai yār-e-chāra-sāz mirī aag meñ na jal

hazār haif vahī dushmanī pe haiñ maa.il
vo log jin pe hameñ haqq-e-dostī bhī hai

ḳhesh-bīnī jab ki is kā kesh-e-kam-andesh thā
dostī kā paas kartā banda-e-aġhrāz kyuuñ

ek tahzīb hai dostī kī ek meyār hai dushmanī kā
dostoñ ne muravvat na sīkhī dushmanoñ ko adāvat to aa.e

na koī jā ke use dukh mire sunā.egā
na kaam dostī ab shahr bhar kī aa.egī

khul gayā ho na dostī kā bharam
Dar ke ahbāb dekhte haiñ mujhe

dostī ek se bhī tujh ko nahīñ
aur sab se inaad hai ham ko

ḳhuun kī ravānī meñ is qadar mohabbat hai
nafratoñ ke halqoñ se dostī nahīñ hotī

butān-e-fitna-jū se kyā tavaqqo.a āshnā.ī kī
bhalā ye dushman-e-jāñ dostī kā raaz kyā jāneñ

ai azāb-e-dostī mujh ko batā mere sivā
kaun thā jo tujh ko siine se lagā kar le gayā

dostī kā bharam hī toḌ diyā
in dinoñ jaane kyā huā hai mujhe

chāhte bhī haiñ chāhte bhī nahīñ
dostī kī na.ī misāl hai ye

na ishq hī ke asar haiñ na dushmanī ke haiñ
ki saare zaḳhm mire dil pe dostī ke haiñ

mujh ko is lafz kā mafhūm batā do yaaro
dostī naam hai jis kā vo jafā hai kyā hai