Tags-Friendship

vo sabab hai merī udāsī kā
us se hai dostī purānī bhī

abhī to aa.ine se hai musalsal dostī apnī
shanāsā.ī kahāñ rahtī agar chehra badal lete

ye hai turfa sūrat-e-dostī ki nigāh-e-dil hama barf haiñ
na vo baada hai na vo zarf haiñ na vo harf haiñ na hikāyateñ

yahāñ se dostī kī kitnī tāmīreñ uThā.ī haiñ
rafāqat kī hayāt-afroz duniyā.eñ basā.ī haiñ

dushmanī kab thī hāsil-e-'maqsūd'
haath baḌhte haiñ dostī ke liye

maiñ jo kahtā huuñ tū kajravī chhoḌ de
vo ye kahtī hai tū dostī chhoḌ de

tumhārī bas tumhārī dushmanī meñ
maiñ sab se dostī karne lagā huuñ

kaun DhūñDhe dost phir se kaun phir se khaa.e zaḳhm
har kisī kī dostī kī apnī ik raftār hai

ban ga.ī jaan par mohabbat meñ
dostī ban ke dushmanī aa.ī

har ek lafz meñ poshīda ik alaao na rakh
hai dostī to takalluf kā rakh-rakhāo na rakh

zamāna-sāz haiñ jo vo haiñ maslahat-andesh
jo ho ḳhulūs se aarī vo dostī kyā hai

haqīqī dostī vo hai ho jis meñ josh-o-ḳharosh
nashāt-e-rūh na ho jis meñ ḳhush-dilī kyā hai

terī sifāt se na rahā kaam kuchh mujhe
bas terī sirf dostī bizzāt rah ga.ī

tumheñ yaqīn thā ham dostī nibhā leñge
hameñ gumān thā jis kā vahī huā āḳhir