Tags-Aashiq

āshiq ke zaḳhm dekh ke iisā ne kah diyā
ye to nazar kī choT hai talvār kī nahīñ

āshiq ke dam se husn kī duniyā ko hai faroġh
bulbul nahīñ to raunaq-e-gulzār hī nahīñ

kam-nigāhī hor taġhāful mat kar ai māh-e-tamām
muk tirā kartā hai ġhamza kaam āshiq kā tamām

sach batā ai āshiq-e-derīna-e-fikr-e-ma.āsh
zahr meñ tiryāk ke unsur kī bhī kī hai talāsh

āshiq-e-nām-e-vatan kushta-e-armān-e-vafā
mard-e-maidān-e-vafā jism-e-vafā jān-e-vafā

āshiq-e-abrū huuñ karnā dīda-o-dānista qatl
jauharoñ se tujh meñ ai talvār āñkheñ ho ga.iiñ

āshiq-e-zulf-o-ruḳh-e-dildār āñkheñ ho ga.iiñ
mubtalā-e-kāfir-o-dīñdār āñkheñ ho ga.iiñ

farhād kohkan thā ye ik halkī baat hai
āshiq thā be-sutūñ kā uThānā garāñ na thā

luTtā hai ḳhāna-e-dil-e-āshiq bachā.iye
bigḌī huī hai fauj-e-mizha kis gunāh par

taġhāful kaj-adā.ī bevafā.ī āshiq-e-zārī
butoñ ko kyā nahīñ aatā ye haiñ ustād har fan ke

qatl-e-āshiq to tirī aañkh kā jaada Thahrā
lab-e-īsā kā tire lab meñ asar hai ki nahīñ

ḳhudā ke āshiq to haiñ hazāroñ banoñ meñ phirte haiñ maare maare
maiñ us kā banda banūñgā jis ko ḳhudā ke bandoñ se pyaar hogā

shauq-e-āshiq-kushī bhalā hī sahī
rahm karnā bhī par burā kyā hai

aap se yūsuf hazāroñ ham se āshiq saikḌoñ
husn kā toḌā nahīñ qaht-e-tamāshā.ī nahīñ

daañt piisā na karo āshiq par
jaan yuuñ hoñTh chabāyā na karo

dil-e-āshiq meñ hasrat bhī hai armāñ bhī tamannā bhī
vo jis bastī meñ rahte haiñ baḌī ābād bastī hai

kis tarah se māniye yaaro ki ye āshiq nahīñ
rañg uḌā jaatā hai Tak chehra to dekho 'mīr' kā

shaad us se hoñ ki is qātil-e-ālam ne ḳhud aaj
kah ke o āshiq-e-nāshād pukārā mujh ko

baiThe baiThe vo kiyā karte haiñ har gul pe nazar
dil-e-āshiq hai magar sair kā gulshan un kā

haar dekhā bhī ḳhūn-e-āshiq kā
aap aur sar jhukā.e baiThe haiñ