Tags-Aashiq

vo jo āshiq haiñ apne hāthoñ se
pheñk dete haiñ kaaT kar sar ko

āshiq ke sar ke saath hai saudā-e-kū-e-yār
momin na thā vo jis ko havā-e-jināñ na thī

'nasīr' kahte to sab yahāñ haiñ ki us ke āshiq haiñ ham va-lekin
baḌā sitam ho baḌā ġhazab ho agar vo aa jaa.e imtihāñ par

nahīñ hai taab zabt-e-ġham kisī āshiq ke imkāñ meñ
dil-e-ḳhūñ-gashta yā dāman meñ hogā yā garebāñ meñ

apnī sūrat pe kahīñ aap na āshiq honā
be-tarah dekhte ho aa.ina tum to baiThe

mashrab-e-āshiq-e-be-nām-o-nishāñ maiñ 'āgāh'
lā-makāñ ain makāñ thā mujhe ma.alūm na thā

ye rupahlī chhāñv ye ākāsh par tāroñ kā jaal
jaise suufī kā tasavvur jaise āshiq kā ḳhayāl

tirā bhī naam chhapā vaj.h-e-marg-e-āshiq meñ
ye dekh be-ḳhabare yuuñ ḳhabar banāte haiñ

sūrat badal ga.ī koī pahchāntā nahīñ
āshiq tirā vatan meñ ġharīb-ul-vatan huā

karne to do savāl kareñ haiñ to kyā
āshiq huuñ maiñ bhī ik but-e-ḳhāna-ḳharāb kā

hamesha se āshiq satā.e ga.e haiñ
hameñ kyā na.e yaañ jalā.e ga.e haiñ

bahut se zamīñ meñ dabā.e ga.e haiñ
bahut un ke āshiq jalā.e ga.e haiñ

āshiq to jānte haiñ vo ai dil yahī sahī
har-chand be-asar hai par aah o fuġhāñ na chhoḌ

dil āñkhoñ se āshiq bachā.e hue haiñ
hiran ko vo chītā banā.e hue haiñ

na khīñcho āshiq-tishna-jigar ke tiir pahlū se
nikāle par hai misl-e-māhi-e-tasvīr pahlū se

pukāre kahtī thī hasrat se na.ash āshiq kī
sanam kidhar ko hameñ ḳhaak meñ milā ke chale

sun liyā naam vafā kā hai kisī āshiq se
jaan ab kaahe ko chhoḌeñge vafādārī kī

kyā huā us ne jo āshiq se jafākārī kī
ruuh ne jabki na qālib se vafādārī kī

ishq meñ jazba-e-āshiq bhī ajab hotā hai
jaan detā hai tire naam pe hañste hañste

merā ehsān hai merā āshiq-e-sādiq hai sanam
jabki ye bhī na ho maiñ paḌhūñ ash.ār ki tū