Tags-Aashiq

dil-e-āshiq ko kyuuñ jalātā hai
ye bhī kyā koh-e-tūr hai terā

āshiq se pūchhiye na sar-e-bazm hāl-e-dil
parde kī baat sunte haiñ chupke se kaan meñ

ka.abe se ġharaz us ko na but-ḳhāne se matlab
āshiq jo tirā hai na idhar kā na udhar kā

tire āshiq kī sūrat ab to pahchānī nahīñ jaatī
satāte haiñ bhalā is tarah aisā is qadar itnā

vo āshiq haiñ ki marne par hamāre
kareñge yaad ham ko umr bhar aap

na āshiq haiñ zamāne meñ na ma.ashūq
idhar ham rah ga.e haiñ aur udhar aap

duur tak miltā nahīñ hai us meñ āshiq kā vajūd
ishq aisī dhuup hai jis meñ koī saaya nahīñ

ho.e āshiq un ke haiñ mard o zan ye anokhī un kī bhī kuchh nahīñ
koī taaza aa.e haiñ barhaman ye jo kāshī aur praag se

muñh pe āshiq ke mohabbat kī shikāyat nāseh
baat karne kā bhī nādāñ na qarīnā aayā

āshiq the shahr meñ jo purāne sharāb ke
haiñ un ke dil meñ vasvase ab ehtisāb ke

ram-o-shauq kī bhī ajā.ib kashish hai
burā haal hai āshiq-e-ḳhasta-tan kā

kyā kisī parda-nashīñ par hai tū āshiq 'mārūf'
chhup ke jo gosha-e-pinhāñ kī taraf jaatā hai

shā.er hai to adnā hai, āshiq hai to rusvā hai
kis baat meñ achchhā hai kis vasf meñ aalī hai

udhar us ko to mere naam se bhī nañg hai har-dam
idhar siine meñ dil mushtāq hai āshiq hai maa.il hai

muqarrar jab ki jāñ-bāzoñ meñ us kā ho chukā marnā
huā tab is qadar ḳhush-dil goyā āshiq ne jag jiitā

vo māh-rū chhupā hai mahāq-e-hijāb meñ
āshiq ke zindagī kā mahīna tamām hai

husn kī shart-e-vafā jo Thahrī tesha o sañg-e-girāñ kī baat
ham hoñ yā farhād ho āḳhir āshiq to mazdūr rahā

jab tū chale janāza-e-āshiq ke saath saath
phir kaun vārisoñ ke sune izn-e-ām ko

vāqif-e-lazzat-e-āzār nahīñ har koī
kyā mazā ġham meñ hai ye āshiq-e-dil-gīr se pūchh