Tags-Gham

mat kar ajab jo 'mīr' tire ġham meñ mar gayā
jiine kā is marīz ke koī bhī Dhañg thā

na aah dil meñ na āñkhoñ meñ ashk baaqī haiñ
havās rishta-e-ġham paar kar ga.e shāyad

chalo yahāñ se kahīñ aur mar raheñ māmūn
tuyūr-e-ġham bhī makāñ ḳhālī kar ga.e shāyad

merī tanhā.ī mirā ġham dekh kar
āsmāñ bhī ashk barsāne lage

karte 'hurmat' kī ġham-ḳhvārī
ġham ne kahāñ dī itnī mohlat

dekh ke ġhair ke pahlū meñ tujhe raqs-kunāñ
bhiig jaatī hai mirī aañkh sarishk-e-ġham se

sab ġham kaheñ jise ki tamannā kaheñ jise
vo iztirāb-e-shauq hai ham kyā kaheñ jise

ne.amat kā e'tibār hai husn-e-qubūl se
ishrat bhī ek ġham hai gavārā kaheñ jise

pahle hayāt-e-shauq thī allāh-re inqalāb
ab e'tibār-e-ġham hai tamannā kaheñ jise

palkoñ par nam baaqī hai
ab tak vo ġham baaqī hai

pursish-e-ġham se mire ġham ko do-bālā na kareñ
ye karam aaj se ā.inda dobārā na kareñ

ishq vaale haiñ mubtalā-e-ġham
husn vāloñ kā hai bhalā dar-pesh

hazāroñ mushkileñ haiñ aur lākhoñ ġham liye haiñ ham
mohabbat kā magar hāthoñ meñ ik parcham liye haiñ ham

palaTiye gar kabhī fursat mile aurāq maazī ke
hamārī kyā sifat bhī aur kyā kyā ġham liye haiñ ham

jin lamhoñ ne luuT liyā thā mere dil kī duniyā ko
aksar merī mahfil-e-ġham meñ aate jaate rahte haiñ

ham ko ġham-e-daurāñ bhī nahīñ hai aur ġham-e-jānāñ bhī nahīñ
jaane phir kyuuñ baat baat par ashk bahāte rahte haiñ

mujh ko har ik afsāne meñ apnā aks nazar aa.e
log mujhe hī mere ġham kā haal sunāte rahte haiñ

ġham nahīñ jo ḳhvāboñ kī luT ga.ī haiñ ta.abīreñ
ham nazar ke tāqoñ meñ aur ḳhvāb likkheñge

zaḳhm-e-dil roz kuredo to ho lazzat afzūñ
ik mudāvā hai ġham-e-yār ho marham jaise