Tags-Gham

mere ġham se zarā vāqafiyyat baḌhā
dekhnā terā ġham ḳhatm ho jā.egā

shiddat-e-ehsās-e-ġham se jab bhī ghabrātā hai dil
āñsuoñ meñ apnī aahoñ ko Dubo letā huuñ maiñ

kisī kā dard bāñTe ġham meñ ro.e
'zafar' ehsās logoñ meñ kahāñ hai

sab jatan haiñ ye magar ik Dil-e-pur-ġham ke liye
jam.a kartī nahīñ daulat ko maiñ atom ke liye

ġham nahīñ hai chāhe jitnī tīrgī qaa.em rahe
mujh pe bas terī nazar kī chāñdnī qaa.em rahe

shafaq huuñ sūraj huuñ raushnī huuñ
salīb-e-ġham par ubhar rahā huuñ

sūraj ko ye ġham hai ki samundar bhī hai pāyāb
yā rab mire qulzum meñ koī sail-e-ravāñ aur

is liye sīñchtā rahtā huuñ maiñ ashkoñ se use
ġham ke paude ko kisī roz shajar karnā hai

tirī be-ruḳhī ne diyā vo ġham jo kisī tarah bhī huā na kam
mujhe ghun kī tarah lagā rahā mirī zindagānī ko khā gayā

ġham hañsī meñ chhupā diyā hogā
chashm-e-nam ne batā diyā hogā

vo zulf khol ke sharmā.eñ ġhair ke ghar aaj
kuchh is adā se shab-e-ġham ho mehmāñ merī

huuñ bas-ki havā-dār tirī ātish-e-ġham kā
phuñk jaa.e jo siina to kabhū hū na karūñ maiñ

sitāra-e-shab-e-ġham kis pe muskurā.eñge
fareb-ḳhūrda-e-paimāñ hai kaun mere sivā

maqtal-e-ġham kī raunaqeñ ḳhatm na hone pā.eñgī
koī to aa hī jā.egā roz sadā diyā karo

'zeb' maujoñ meñ lakīroñ kī vo ġham thā kab se
gardish-e-rañg ne paikar ko uchhālā kaisā

ġham kī bārish ne bhī tere naqsh ko dhoyā nahīñ
tū ne mujh ko kho diyā maiñ ne tujhe khoyā nahīñ

ḳhud se rishte rahe kahāñ un ke
ġham to jaane the rā.egāñ un ke

rañj ġham dard be-kasī hasrat
'mīr' kā jaise intiḳhāb huuñ maiñ

ġham ham ne ḳhushī se mol liyā us par bhī huī ye nādānī
jab dil kī umīdeñ TuuT ga.iiñ qismat se shikāyat kar baiThe

jis tarah lakḌī ko khā jaatā hai ghun
rafta rafta ġham mujhe khā jā.egā