Tags-Gham

masarratoñ ke pharere jahāñ meñ lahrā.eñ
ġham-o-alam ke liye gosha-e-amāñ na rahe

bhañvar biich ġham ke maiñ Dāloñ aur uchhlūñ
ye kahtā hai mujh se ki tū marjiyā hai

sad shukr vo the mā.il-ba-karam mar.ūb the ro.ab-e-husn se ham
un se ahvāl-e-dil-e-pur-ġham kahne kī jasārat kyā karte

soḳhta kashtī kā malba maiñ mirā dil aur shaam
ġham-zada utre hue dariyā kā sāhil aur shaam

soz-e-ġham-e-firāq se dil ko bachā.e kaun
zālim tirī lagā.ī huī ko bujhā.e kaun

miTTī marīz-e-ġham kī Thikāne lagā.e kaun
duniyā to un ke saath hai mayyat uThā.e kaun

tevar chaḌhā ke pūchh rahe haiñ vo hāl-e-dil
rūdād-e-ġham to yaad hai lekin sunā.e kaun

ġham rahā jab tak ki dam meñ dam rahā
dil ke jaane kā nihāyat ġham rahā

sair-e-dariyā señ nahīñ ham kuuñ tasallī mumkin
ġham ke tūfān ubalte haiñ hamāre man meñ

shiddat-e-zabt se pathrā ga.iiñ āñkheñ bhī 'nadīm'
ġham rahā saath meñ par girya-o-zārī na rahī

sajāo bazm ġhazal gaao jaam taaza karo
''bahut sahī ġham-e-gītī sharāb kam kyā hai''

zindagī niklī thī har ġham kā mudāvā karne
chand chehroñ ne ḳhayālāt kā ruḳh moḌ diyā

huzūr-e-husn se ḳhushiyāñ na mil sakīñ na sahī
matā-e-ġham se to sad shukr bā-farāġh rahā

dil ne chāhā thā jise apne sahāre kī tarah
ġham usī shaḳhs kā bhaḌkā hai sharāre kī tarah

terā ehsān na bhūlūñgā ġham-e-yār ki tū
roz sajtā hai mirī aañkh meñ taare kī tarah

zamīñ ke jism pe yuuñ yūrish-e-qazā kab tak
falak-nashīnoñ yūñhī ġham kā silsila kab tak

jo terī zulf ke saa.e meñ chand din guzre
vo ġham kī dhuup meñ yaad aa.e sā.ebāñ kī tarah

ye nizām-e-bazm-e-sāqī kahīñ rah sakegā baaqī
ki ḳhushī to chand lamhe ġham o dard jāvedānī

vo ḳhush-nasīb huuñ ki ġham-e-iltifāt se
mere ġham-e-hayāt kā darmāñ kiyā gayā

muḳhtalif apnī kahānī hai zamāne bhar se
munfarid ham ġham-e-hālāt liye phirte haiñ