Tags-Gham

ilāhī ek ġham-e-rozgār kyā kam thā
ki ishq bhej diyā jān-e-mubtalā ke liye

ġham jo āzār thā ik daulat-e-bedār hai ab
ham to is daulat-e-bedār se aage na ga.e

marīz-e-ġham ke sahāro koī to baat karo
udaas chāñd sitāro koī to baat karo

isī tarah se ajab kyā jo kuchh sukūn mile
ġham-e-firāq ke maaro koī to baat karo

tumhārā ġham bhī miTātī haiñ mastiyāñ ki nahīñ
sharāb-e-nāb ke maaro koī to baat karo

raat bezār sā ghar se jo maiñ tanhā niklā
chāñd bhī jaise mere ġham kā shanāsā niklā

pahle dukh dard ka.ī dil meñ sambhāle maiñ ne
phir kiyā ḳhud ko tire ġham ke havāle maiñ ne

tere ġham se kiyā duniyā ke ġhamoñ kā chāra
yaanī ik ḳhaar se sab ḳhaar nikāle maiñ ne

ġham kā fasāna sunñe vaalo āḳhir-e-shab ārām karo
kal ye kahānī phir chheḌeñge ham bhī zarā ab so leñ haiñ

aisā thā dil kā sāneha vo sañg-dil bhī ro paḌā
'ḳhālid' ne jab zarā se ġham kā ishtirāk kar liyā

umr bhar kā ġham banī hai 'nūr' vo pal kī ḳhushī
hosh ke aalam meñ bhī chhāne lagīñ be-hoshiyāñ

kabhī malhūz ham ko bhī suḳhan meñ rabt-e-ma.anī thā
huā hai zahr-e-ġham āshufta-kār āhista āhista

mar ga.e ġham siiñ tumhāre ham piyā
kab talak ye ḳhūn-e-ġham khānā sajan

nazzāra-e-nigāh hai ye jaltā-bujhtā din
kuchh ġham nahīñ jo raat kī dāvat badal ga.ī

ġham-e-dil hī merā nikāl do mirī zindagī se jo tum agar
to vo dāstāñ hī kuchh aur hai mire hāl-e-dil kā bayāñ nahīñ

maiñ sunā.ūñ kis ko ye hāl-e-dil maiñ dikhā.ūñ kis ko ye dard-o-ġham
maiñ huuñ aisī hālat-e-zār meñ ki ḳhud apnā mujh ko gumāñ nahīñ

ġham-e-hayāt ne shā.ir banā diyā 'ḳhurshīd'
vagarna maiñ kahāñ aur shā.irī kā ye e.azāz

dard-e-ġham-e-firāq se āñkheñ haiñ ashk-bār kyā
rone se hogī muḳhtasar zahmat-e-intizār kyā

ho chukī ḳhatm shām-e-ġham āñkhoñ meñ aa chukā hai dam
ab bhī marīz-e-hijr ko un kā hai intizār kyā

sunā dī kis ne rūdād-e-ġham-e-dil kohsāroñ ko
maiñ akasr sochtā huuñ dekh kar in ābshāroñ ko