Tags-Gham

maiñ vo dīvāna thā jis ke liye bazm-e-ġham meñ
jā-ba-jā bichhne ko pariyoñ kī ridā.eñ aa.iiñ

ai dost samajhtā huuñ tirī pursish-e-ġham ko
bātoñ se kabhī dard kā darmāñ nahīñ hotā

ġham ke hāthoñ na rahā kuchh bhī rafū ke qābil
bas-ki sau baar huā chaak garebāñ merā

ġham musalsal ho to ahbāb bichhaḌ jaate haiñ
ab na koī dil-e-tanhā ke qarīñ aa.egā

falak se kaise mirā ġham dikhā.ī degā tujhe
kabhī zamīn pe aa aur zamīñ se dekh mujhe

phir ga.iiñ bīmār-e-ġham ko dekh kar
apnī āñkhoñ kī muravvat dekhnā

kise jur.at-e-tasallī ki vo baat hī thī aisī
shab-e-intizār chup thī mire ġham-gusār chup the

kisī aañkh meñ nahīñ ashk-e-ġham tire ba.ad kuchh bhī nahīñ hai kam
tujhe zindagī ne bhulā diyā tū bhī muskurā use bhuul jā

kyuuñ aTā huā hai ġhubār meñ ġham-e-zindagī ke fishār meñ
vo jo dard thā tire baḳht meñ so vo ho gayā use bhuul jā

dīda-o-dil kī fazā par ġham ke bādal chhā ga.e
us ke jaate hī nigāhoñ ke ufuq sañvlā ga.e

pursish-e-hāl se ġham aur na baḌh jaa.e kahīñ
ham ne is Dar se kabhī haal na pūchhā apnā

hijr hijrat malāl ġham āsār
zindagī kī naved ho ga.e kyā

abhī tak vo nahīñ aa.e yaqīnan raat baaqī hai
hamārī ġham-gusārī ko sitāro tum hī aa jaao

'shakeb'-e-ġham-zada ko dard se hai ab kahāñ fursat
agar kuchh vaqt mil jaa.e to pyāro tum hī aa jaao

juuñ sham.a tujh ko ātish-e-ġham se gurez kyuuñ
sar par dharī hai aag qadam tak pighal ke chal

rah-navard-e-bayābān-e-ġham sabr kar sabr kar
kārvāñ phir mileñge baham sabr kar sabr kar

vo kah rahe the ki shā.ir ġhazab kā hai 'irfān'
har ek sher meñ kyā ġham hai kyā udāsī hai

hai dalne ko chhātī pe tirī muuñg ḳhat-e-sabz
gar zahr-e-ġham-e-hijr khilāyā to huā kyā

jis meñ umīd-o-yās fareb-e-nazar rahī
is haft-ḳhvān-e-ġham kī rivāyāt le chaleñ

ab tak jo jī chukā huuñ janam gin rahā huuñ maiñ
duniyā samajh rahī hai ki ġham gin rahā huuñ maiñ