Tags-Gham

shaitāñ sifat sharāre oḌhe dhueñ ke kambal
doshīzgī ġham ko jhulsā.eñ jab musalsal

ḳhalish-e-ishq se bachpan hai dil ek taraf
is pe yā-rab ġham-e-hastī bhī uThānā hai hameñ

ai shab-e-ġham koī to aahaT kar
kaaT khā.egā merā ghar mujh ko

jānte the ġham tirā dariyā bhī thā gahrā bhī thā
Dūbne se peshtar sochā bhī thā samjhā bhī thā

ḳhudā ḳhāmosh hai aur ḳhauf-o-ġham se nīm-jāñ insāñ
havā kī lahr ko bhī maut kī aahaT samajhte haiñ

ho kar ḳharāb-e-mai tire ġham to bhulā diye
lekin ġham-e-hayāt kā darmāñ na kar sake

har musībat hai be-mazā shab-e-ġham
aafat aafat ko dekhtā huuñ maiñ

phūñk kar saarā chaman jab vo sharīk-e-ġham hue
un ko is aalam meñ bhī ġham-āshnā kahnā paḌā

ashk to itne bahe 'chandā' ki chashm-e-ḳhalq se
qurrat-ul-ain-e-alī ke ġham meñ bah jaatī hai niind

ye dil to dushman-e-jānī hai ek muddat se
jo ġham-navāz ho aisā ġham-āshnā de do

aur ab ye chāhtā huuñ koī ġham baTā.e mirā
maiñ apnī miTTī kabhī aap Dhone vaalā thā

milā na thā pa bichhaḌne kā ġham na thā mujh ko
jalā nahīñ thā magar raakh hone vaalā thā

zarā dam lo to phir tum ko sunā.īñ dāstāñ dil kī
abhī kuchh rañg bharnā hai hameñ ġham ke fasāne meñ

mujh ko yāroñ ne nahlā ke kafnā diyā do ghaḌī bhī na biitī ki dafnā diyā
kaun kartā hai ġham TūTte hī ye dam kar diyā intizām āḳhirī āḳhirī

koī aalam ho bahar-hāl guzar jaatā hai
ham na sargashta-e-rāhat haiñ na āshufta-e-ġham

kahīñ ḳhushī kī numā.ish meñ rakh diyā jā kar
kal us ne basta-e-ġham taaq se utārā mirā

surūr o ġham hai kyā 'ḳhālid'-miyāñ
kitāb-e-zīst kī tafsīr hai

jo ibārat na ho tire ġham se
ahl-e-dil par vo zindagī hai harām