Tags-Gham

haiñ hazāroñ dafn aañsū mirī qabr-e-ārzū meñ
na dil-e-hazīñ ko tum bhī kabhī ġham-gusār karnā

nahīñ juz girya-e-ġham hāsil-e-ishq
hamārī chashm-e-dariyā-bār se pūchh

koī bādal tapish-e-ġham se pighaltā hī nahīñ
aur dil hai ki kisī tarah bahaltā hī nahīñ

bin kar har ek bazm kā mauzū-e-guftugū
sheroñ meñ tere ġham ko samoyā kareñge ham

ġham aur bhī dil kā jo shab-e-hijr baḌhā.e
is sham-e-fasurda ko bujhā kyoñ nahīñ dete

tire ḳhayāl ke pahlū se uTh ke jab dekhā
mahak rahā thā zamāne meñ chār-sū tirā ġham

hijr meñ ġham bhī ek ne.amat hai
ye na hotā to aaj khāte kyā

shajar meñ ziist ke hai shāḳh-e-ġham samar-āvar
jo in rutoñ meñ phale shā.irī to achchhā hai

nahīñ jo lazzat-e-duniyā nashāt-e-ġham hī sahī
mile jo yak-do nafas sarḳhushī to achchhā hai

mushkileñ āsāñ na hoñ merī to mujh ko ġham nahīñ
par jo hai āsāñ kam az kam vo to ab mushkil na ho

kyuuñ ḳhalvat-e-ġham meñ rahte ho kyuuñ gosha-nashīñ bekār hue
āḳhir tumheñ sadma kyā pahuñchā kyā soch ke ḳhud-āzār hue

kyuuñ tark-e-alā.iq ko tum ne samjhā hai ilāj-e-ġham āḳhir
dekho to valī suufī bhī yahāñ kis ThaaT ke duniyā-dār hue

ġham to haiñ baḳht ke bāzār meñ maujūd bahut
kāsa-e-jism meñ dil ek adad hai had hai

kahīñ fasāna-e-ġham hai kahīñ ḳhushī kī pukār
sunegā aaj yahāñ kaun zindagī kī pukār

hañste hoñToñ se bhī jhaḌte haiñ fasāne ġham ke
ḳhushk āñkhoñ meñ bhī sāvan kī jhaḌī hotī hai

ġham-hā-e-nā-rasā.ī-e-zauq-e-talab sameT
arzāniyoñ se shauq kī mushkil kashīd kar

aage harīm-e-ġham se koī rāsta na thā
achchhā huā ki saath kisī ko liyā na thā

ek vo haiñ ki jinheñ apnī ḳhushī le Duubī
ek ham haiñ ki jinheñ ġham ne ubharne na diyā

aish-e-bazm-e-be-ḳhudī josh-e-fuġhāñ ho jā.egā
ham kahāñ hoñge jo rāz-e-ġham ayaañ ho jā.egā

ġham se mere ghar meñ gunjā.ish nahīñ hai aish kī
naġhma-ḳhvāñ bhī aa.egā to nauha-ḳhvāñ ho jā.egā