Tags-Gham

zamīn-e-qibla-e-avval tujhe ḳhudā rakhe
ki dil huā hai tire ġham meñ paarā paarā mirā

saath ġhairoñ ke vahāñ tum to nahāne ko ga.e
ro.e yaañ ham ġham-e-furqat meñ tumhāre dariyā

ġham hai sauġhāt kī sūrat yārab
tū mire ġham ko musalsal kar de

haiñ 'masrūr' āñkheñ tumhārī jo pur-nam
batāo ye aañsū haiñ ġham yā ḳhushī ke

aatā nahīñ vo yār-e-sitamgar to kyā huā
koī ġham to us kā dil se hamāre judā nahīñ

rah-e-talab meñ hameñ ġham pe ġham nazar aa.e
ba-qadr-e-zauq magar phir bhī kam nazar aa.e

har ik ranj-o-ġham se subuk-dosh ho jā
use yaad kar aur mad.hosh ho jā

tere ġham ne mirī zindagī ko
lazzat-e-zindagī baḳhsh dī hai

ai shaah ke ġham meñ jaan khone vaalo
ai ibn-e-alī ke sadqe hone vaalo

sāya-e-atifat meñ rahtā huuñ
ġham tirā rāhatoñ se baḌh kar hai

surūr-e-bāda-e-ranj-o-ġham-e-hayāt kabhī
na kaam aayā kisī ke na kaam aa.egā

rahtā nahīñ insān to miT jaatā hai ġham bhī
so jā.eñge ik roz zamīñ oḌh ke ham bhī

tirī rahmatoñ se hai duur kab mirī chāra-sāzī-e-be-kasī
kisī ġham-nasīb kī dahr meñ ye sadā se ḳhaas pukār hai

paḌī rahegī agar ġham kī dhuul shāḳhoñ par
udaas phuul khileñge malūl shāḳhoñ par

lafz yuuñ ḳhāmushī se laḌte haiñ
jis tarah ġham hañsī se laḌte haiñ

yuuñ to ham ne qisse likkhe rañgā-rañg
lekin ġham kā qissa hī mash.hūr huā

rafta rafta dard-e-dil yuuñ kam ho jaatā hai
merā ġham us kī ḳhushiyoñ meñ zam ho jaatā hai

unheñ ġham yahī hai ki un ke saroñ par
koī āsmāñ hai na paañv ke nīche zamīñ hai

rahe qaid-o-band kī lazzateñ ki aziyyateñ bhī haiñ rāhateñ
maiñ qafas meñ aate hī sarhad-e-ġham-e-āshiyāñ se guzar gayā

merī soch laraz uTThī hai dekh ke pyaar kā ye aalam
terī āñkhoñ se Tapkā hai aañsū ban kar merā ġham