Tags-Gham

ashk kī bārish meñ dil se ġham nikal aatā nahīñ
ghar se bāhar meñh barasne meñ koī jaatā nahīñ

hikāyat-e-ġham-e-duniyā tavīl thī kah dī
hikāyat-e-ġham-e-dil muḳhtasar hai kyā kahiye

shab-e-ġham añdherī hai kis qadar karūñ kaise sub.h kā maiñ safar
mire chāñd aa mirī le ḳhabar mujhe raushnī kā hisār de

yaad kā chāñd jo ubhrā to ye āñkheñ huiiñ nam
ġham kī Thahrī huī naddī meñ ravānī aa.ī

sub.h se kuchh ajiib ġham dasht meñ haiñ hamāre saath
in ke saroñ pe maiñ zarā chādar-e-shām Daal duuñ

ham ne ik haath se thāmā shab-e-ġham kā āñchal
aur ik haath ko dāmān-e-sahar par rakkhā

nashāt-e-nau kī talab hai na taaza ġham kā jigar
sukūñ-girafta ko kaise ho zer-o-bam kā jigar

ġham-e-rashk ko talḳh samjhe the hamdam
so vo bhī gavārā huā chāhtā hai

ġham kī tasvīr ban gayā huuñ maiñ
ḳhātir-e-dard-āshnā huuñ maiñ

zabt-e-ġham be-sabab nahīñ 'jazbī'
ḳhalish-e-dil baḌhā rahā huuñ maiñ

na rahā bulbul o parvāna ko ishq-e-gul-o-sham.a
naam ko bhī koī āshiq na rahā mere ba.ad

zikr-e-nashāt ḳhalvat-e-ġham meñ burā lage
tum bhī agar milo to mujhe hādisa lage

aisā bhī nahīñ dard ne vahshat nahīñ kī hai
is ġham kī kabhī ham ne ishā.at nahīñ kī hai

rūdād-e-shab-e-ġham yuuñ Dartā huuñ sunāne se
mahfil meñ kahīñ un kī sūrat na utar jaa.e

mire zaḳhm saare mahak uThe jo chalī havā-e-nihāl-e-ġham
koī dasht-e-jāñ se guzar gayā uThī gard tere ḳhayāl kī

un kī palkoñ par sitāre apne hoñToñ pe hañsī
qissa-e-ġham kahte kahte ham kahāñ tak aa ga.e

shahr-e-ḳhūbāñ kī rivāyāt se shorish kar ke
ġham-e-hijrāñ ke sazā-vār hue haiñ ham log

ishq kab apne maqāsid kā nigahbāñ na huā
kaun sā ġham hai jo āḳhir ġham-e-jānāñ na huā

laakh chāhā magar afsos ki aañsū na thame
zabt-e-ġham mujh se ba-qadr-e-ġham pinhāñ na huā

terī ishrat hai ki gardūñ ke dabā.e na dabī
merā ġham hai ki hañsī meñ bhī numāyāñ na huā