Tags-Gham

din ke bolte hañgāme meñ akasr soyā rahtā hai
karvaT le kar jaag uThtā hai raat kī chup meñ terā ġham

terā ġham ham dīvānoñ ko kis aalam meñ chhoḌ gayā
ek zamāna ham se ḳhafā hai ek jahāñ se ham barham

umar bhar jis ko tire ġham kī amānat samjhā
ab vahī tār-e-nafas TuuT gayā hai mujh meñ

rāz-e-ġham faash na ho is liye rokī thī zabāñ
chup bhī rah kar yahī hogā mujhe ma.alūm na thā

dil maze letā hai jis ġham ke vo hai kāhish-e-jāñ
zahr bhī hotā hai mīThā mujhe ma.alūm na thā

ma.alūm yuuñ huā ki nasīboñ meñ nahīñ shifā
shamshīr-e-ġham kā vaar jigar paar thā so hai

ab lag ġham-e-firāq judā.ī kī raat meñ
yaaro rafīq-o-mūnis-o-ġham-ḳhvār thā so hai

pī jā ayyām kī talḳhī ko bhī hañs kar 'nāsir'
ġham ko sahne meñ bhī qudrat ne mazā rakkhā hai

ek saudā hai lazzat-e-ġham hai
aaj phir merī aañkh pur-nam hai

tujh se parda nahīñ mire ġham kā
tū mirī zindagī kā mahram hai

ranj-o-ġham uThā.e haiñ fikr-o-fan bhī paa.e haiñ
zindagī ko jitnā bhī jī sake jiyā ham ne

jab apne ġham kā fasāna unheñ sunāte haiñ
zamāna hañstā hai ham par vo muskurāte haiñ

bichhaḌ ke ġham meñ tere kitnā tanhā ho gayā huuñ maiñ
galī kā juuñ koī vīrān konā ho gayā huuñ maiñ

mire marne kā ġham to be-sabab hogā ki ab ke baar
mire andar to koī aur paidā hone vaalā hai

garche haiñ mūnis-o-ġham-ḳhvār tag-o-dau meñ sahī
par tirī tab.a ko kab raah pe lā sakte haiñ

saare ahd kā bojh thā sar par dil meñ saare jahāñ kā ġham
vaqt kā jaltā ubaltā sahrā ham ne jis dam paar kiyā

tumhāre dard-mandoñ kī ḳhabar le
ġham-e-daurāñ ko aisī kyā paḌī hai

yuuñ dil meñ guzartā hai jā kar kisī sahrā meñ
ḳhātir ko Tuk ik ġham se āzād karūñ ro.uuñ

vo ġham qubūl hai jo tirī chashm se mile
ham ko hunar tamām usī zaḳhm se mile

kartā maiñ ab kisī se koī iltimās kyā
marne kā ġham nahīñ hai to jiine kī aas kyā