Tags-Gham

ġham-e-duniyā ġham-e-uqbā ġham-e-hastī ġham-e-maut
koī ġham bhī to harīf-e-ġham-e-jānāñ na huā

dil ke makāñ meñ aañkh ke āñgan meñ kuchh na thā
jab ġham na thā hayāt ke dāman meñ kuchh na thā

'fāzil' ruḳh-e-hayāt pe yuuñ thiiñ masarrateñ
jaise ġham-e-hayāt kī uljhan meñ kuchh na thā

ġhair ke ghar sahī vo aayā to
ġham hī mere liye vo laayā to

vo jo chashm-e-tar meñ Thahar gayā vo sitāra jaane kidhar gayā
na nashāt-e-ġham kā hujūm ab na hī sabz yaad kī Daal hai

apnī qismat meñ ġham-e-arsa-e-hijrāñ hai to kyā
ashk minnat-kash-e-gahvāra-e-mizhgāñ hai to kyā

baiThā huuñ durūn-e-ḳhāna-e-ġham
sailāb-e-balā kā muntazir huuñ

shāyad ki vahāñ mafar ho ġham se
tasḳhīr-e-ḳhalā kā muntazir huuñ

maiñ us kī bātoñ meñ ġham apnā bhuul jaatā magar
vo shaḳhs rone lagā ḳhud hañsā hañsā ke mujhe

vo jise terā mustaqil ġham hai
terī mahfil meñ bhī udaas rahā

bhalā arz-e-ġham se guzar ke bhī kabhī tum se koī gila kiyā
ye junūn-e-ishq ke tazkire to mirī vafā ke sile na the

ġham-e-firāq kī talḳhī vo dasht hai ki jahāñ
koī qarīb to kyā ās-pās bhī na rahe

vo dar khulā mere ġham-kade kā
vo aa ga.e mere milne vaale

apnī shikāyateñ na sahī terā ġham sahī
iz.hār-e-dāstāñ kā koī silsila to hai

sar se dayār-e-ġham ke sanīchar utaar de
mañgal hai jis meñ jā ke vo jañgal uThā to lā

ye kyā kahā ki ġham-e-ishq nāgavār huā
mujhe tū jur.a-e-talḳh aur sāzgār huā

vo lamha dil kī aziyyat kā to guzar gayā ab sochne do
kyā kahnā hogā un se mujhe jo pursish-e-ġham ko aa.e haiñ

ahl-e-ġham ke saath un kā dard-o-ġham sahtī huuñ maiñ
kāñpte hoñToñ pe ban kar bad-duā rahtī huuñ maiñ

sabr-e-ayyūbī kā jab labrez hotā hai subū
soz-e-ġham se khaultā hai jab ġhulāmoñ kā lahu

siskiyāñ ik marīz-e-ġham kī haa.e
aap kī dekh-bhāl kyā kahiye