Tags-Gham

bazm-e-ahl-e-tarab ko sharmāo
bazm-e-as.hāb-e-ġham kī baat karo

kisī ke dard pe hañsnā kisī ke ġham meñ ḳhushī
ye lamhe kaash zamāne ko kam se kam milte

ab kisī mausam kī be-rahmī kā koī ġham nahīñ
ham ne āñkhoñ meñ sajā.ī haiñ tirī añgḌā.iyāñ

ġham-e-daurāñ ne kiyā ahl-e-tamannā kā vo haal
dasht se jaise hirāsāñ koī aahū nikle

ġham kī hurmat isī meñ chhupī hai
ek aañsū bhī girne na paa.e

paañv figār meñ to hoñ dil to nahīñ figār-e-ġham
koī sanam nahīñ na ho dasht-e-junūñ-navāz meñ

un kā ġham mujh ko vadī.at ho gayā
saarī duniyā haath mal kar rah ga.ī

ġham ke thapeḌe le ga.e nāgan se lambe baal
rātoñ meñ jañgaloñ kā vo saaya kahāñ se aa.e

jām-e-ġham piite rahe mai kā sahārā na liyā
darmiyāñ dard ke ik raah nikālī ham ne

aur to sab dukh baT jaate haiñ dil ke dard ko kaun baTā.e
duniyā ke ġham bar-haq lekin apnā bhī ġham khānā hogā

dal kī tah meñ 'āzim' un kī yaad rah ga.ī
ġham ubhar ke mere ḳhāl-o-ḳhad meñ aa ga.e

maiñ to chup thā magar us ne bhī sunāne na diyā
ġham-e-duniyā kā koī zikr tak aane na diyā

jaise yād-e-imbisāt-o-ġham shakebā.ī ke baad
der tak rote rahe ham bazm-ārā.ī ke baad

ahbāb ne sau tarah hameñ ḳhvār kiyā
ġham itne diye ham ko ki bīmār kiyā

lazzat-shanās-e-ġham ko hai iz.hār-e-ġham harām
rotā huuñ aur dāman-e-mizhgāñ bhī tar nahīñ

aahoñ ne mujh ko ātish-e-ġham se najāt dī
mānind-e-dūd nār-e-saqar se nikal gayā

shām-e-ġham aaj bhī guzrī hai hasīñ ḳhvāboñ meñ
ġham-e-jānāñ to mohabbat meñ sitam Dhā.egā

jo ġham se nahīñ pighlā vo dil hai bhalā kaise
jo pyaar ko na samjhe vo dil nahīñ patthar hai

itne ġham dete hue ye bhī na sochā us ne
maiñ kisī ġham meñ pareshān bhī ho saktā huuñ

siine se tire ġham ko lagā.e to rakheñge
nā-sāz magar gardish-e-hālāt bahut hai