Tags-Gham

kahte haiñ sun ke tazkire mujh ġham-rasīda ke
afsāne kaun suntā hai hāl-e-shunīda ke

aahoñ kī dhuum hai kahīñ nāloñ ke gulgule
sāmāñ na.e haiñ roz tire ġham-kashīda ke

apnā ġham bhī ġham-e-duniyā ke barābar hai 'urūj'
apnā ġham bhuul sakeñ to ġham-e-duniyā dekheñ

vaqt ab duur nahīñ hai ki uThe shor-e-ġhazab
ġham ke sailāb meñ duniyā ko bahāne vaale

maiñ tire dard ko mahsūs to kar saktā huuñ
maiñ tire ġham kā mudāvā to nahīñ ho saktā

kuchh un kī jafā un kā sitam yaad nahīñ hai
ġhamgīn huuñ lekin koī ġham yaad nahīñ hai

laayā hai kahāñ ye ġham-e-ayyām 'farīd' ab
baḳhshā thā kabhī us ne bhī ġham yaad nahīñ hai

purshis-e-ġham-zadagāñ bahr-e-tafannun hī sahī
ḳhair se aap bhī is bazm meñ shāmil to hue

rashk-e-dushman kī talāfī ko ye pahlū nahīñ kam
ġham-e-jāñ-kāh-e-mohabbat ke vo qātil to hue

ġham-e-mohabbat hai us kā jis ko nahīñ vo ġham ain hai vo rāhat
ḳharāb jo ishq meñ hai us ke nahīñ vo bigḌā banā huā hai

hisār-e-ġham se jo nikle bhī to kidhar aa.e
bahut malāl huā lauT ke jo ghar aa.e

tamāshā dekhte the hamāre zabt-e-ġham kā
musallat ek Dar thā lab-e-iz.hār chup the

hīroñ meñ taultā hai vahī apne aap ko
jo mujh ko bahr-e-ġham se guhar rolne na de

ġhair merā hāl-e-ġham pūchhte rahe magar
dostoñ kī baat hai dushmanoñ se kyā kahūñ

jīte-jī maut kā Dar ba.ad-e-fanā ḳhauf-e-azāb
juz ġham-o-rañj yahāñ hai na vahāñ hai kuchh aur

qismat-e-'shād' meñ juz ġham jo yahāñ kuchh bhī nahīñ
ai havas le chal udhar ko ki jahāñ hai kuchh aur

yaad aayā hai ki ḳhush-bāshī ko
ġham kā afshurda piyā kartā thā

na ḳhushī se hameñ na ġham se ġharaz
hai magar ek us sanam se ġharaz

apnī rūdād kahūñ yā ġham-e-duniyā likkhūñ
kaun sī baat kahūñ kaun sā qissa likkhūñ

itnī be-rabt hai tafsīl-e-ġham-e-zīst 'sharar'
ḳhud samajhne ke liye is kā ḳhulāsa likkhūñ