Tags-Gham

ḳhanda-e-gul ho ki ho girya-e-shabnam 'fāzil'
dāstāñ ġham kī nihāñ kaun se unvāñ meñ nahīñ

musalsal ġham musalsal dard se tañg aa ke ai 'sāhil'
ham aise ahl-e-furqat ne sahar ko shaam likkhā hai

ye bhī bahut hai saiñkaḌoñ paude hare hue
kyā ġham jo bārishoñ meñ koī phuul mar gayā

ġham mujh se kisī taur sameTā nahīñ jaatā
pahrā hai mirī soch pe bolā nahīñ jaatā

āñkhoñ meñ mire ġham kī tasvīr sañjo loge
ye baat na sochī thī dāman ko bhigo loge

ġham ke mujrim ḳhushī ke mujrim haiñ
log ab zindagī ke mujrim haiñ

hai rihā qaid-e-ġham-e-kaunain se
pā-e-tā-sar qaidī-e-zindān-e-ishq

tirī sub.h-e-aish hai kyā balā tujhe ai falak jo ho hausla
kabhī kar le aa ke muqābla ġham-e-hijr-e-yār kī shaam se

kyā thā hamāre paas ba-juz ik sukūt-e-ġham
charke bahut jo tum ne lagā.e to uTh ga.e

dil ko dekhūñ yā jigar ko yā ġham-o-andoh ko
sāz-e-hastī jal rahā hai ab kisī kī yaad meñ

ghirā huā huuñ maiñ kab se jazīra-e-ġham meñ
zamāna guzrā samundar meñ mauj aa.e hue

ḳhud apnā soz-e-talab de sake na jis kā saath
dayār-e-ġham meñ vo kis raushnī ke saath chale

ġham garāñ jab na thā garāñ thā mujhe
jab garāñ ho gayā garāñ na rahā

majbūrī ke chāval bhūne lāchārī do muTThī Daalī
ham ne khāyā ġham ko apne phir guḌ-dhānī karte karte

ġham ke mausam meñ kyoñ kar lī ham ne in ġhazloñ se yaarī
ab to saarī umr kaTegī ashk-bayānī karte karte

ġham-e-hayāt miTānā hai ro ke dekhte haiñ
lahū kā daaġh lahū se hī dho ke dekhte haiñ

ḳhusrav-e-shahr-e-adā hai jo vo rashk-e-shīrīñ
koh-e-andoh-o-ġham-o-yās ke farhād haiñ ham

qaid se bhī na rihā ho ke havā kuchh dil shaad
mubtalā-e-ġham-e-tanhāi-e-sayyād haiñ ham

kyā in aahoñ se shab-e-ġham muḳhtasar ho jā.egī
ye sahar hone kī bāteñ haiñ sahar ho jā.egī

haañ vo bedard to begāna hī achchhā yaaro
jo na tauqīr-e-ġham-e-dard-gusārāñ samjhe