Tags-Gham

kyā us kī shān-e-banda-navāzī kā pūchhnā
baḳhshā hai muflisoñ ko ġham-e-shāh-vār tak

jalā jaatā huuñ bār-e-soz-e-ġham mushkil se uThtā hai
vo ashkoñ se nahīñ bujhtā jo shola dil se uThtā hai

uThtā hai 'dānish' dil se dhuāñ āñkhoñ se Tapakte haiñ aañsū
kyā ātish-e-ġham dene lagī lau kyā dil kā phaphūlā phuuT gayā

qahqaha-bār raho shola-e-ġham se na Daro
varna is shahr-e-hunar meñ baḌī rusvā.ī hai

na koī apnā ġham hai aur na ab koī ḳhushī apnī
tumhīñ kah do ki ham kaise guzāreñ zindagī apnī

fareb-e-ham-safar hai aur rāh-e-ġham kā sannāTā
munāsib hai ki ḳhud ho ai junūñ ab rahbarī apnī

guzārish hai ki ai ma.abūd mujh ko zabt-e-ġham de de
na kar de faash rāz-e-ārzū ko bekasī apnī

taḌap jā.egā har dil shams' kā jab naam aa.egā
numāyāñ yuuñ bhī hogī dāstān-e-ġham kabhī apnī

mehnat-o-dard-o-ranj-o-ġham aur alam ye raat din
karte haiñ mujh ko ḳhvār-o-zār ek do tiin chaar pāñch

ai shab-e-ġham jo ham bhī ghar jaa.eñ
shahr kis ke supurd kar jaa.eñ

dhotā hai suḳhan dil se ġhubār-e-ġham-e-duniyā
hai gard-e-alam ke liye sāvan kī jhaḌī baat

naqsh maazī ke miTā kar sabhī dil se apne
dard-o-ġham se hameñ ik baar ubharnā hogā

ġham-ḳhvāriyoñ kī tah meñ dabī sī masarrateñ
yuuñ mere paas bhī mire ġham-ḳhvār aa.e haiñ

ḳhizāñ ke aane se ho jaa.eñ ġham-zada jo phuul
unheñ qasam hai bahāroñ meñ muskurāne kī

tire taġhāful se hai shikāyat na apne miTne kā koī ġham hai
ye sab ba-zāhir bajā hai lekin ye aañkh kyuuñ aaj merī nam hai

na ho dard-e-judā.ī se jo vāqif us ko kyā kahiye
hameñ vo dekh kar kahte haiñ ġham aisā bhī hotā hai

ash.ār mire dard kī ḳhairāt haiñ 'aḳhtar'
ik shaḳhs ye kahtā thā ki ġham zar kī tarah hai

kaun kis kī ishq ke zindāñ meñ ġham-ḳhvārī kare
ḳhūn-e-dil letā hai mere piine khāne kī ḳhabar

ġham kī sadiyoñ kī amānat hai ġhazal kī tahzīb
'mīr' ke ba.ad usī rañg meñ 'fānī' mahke

mohabbat uTh ga.ī saare zamāne se magar ab tak
hamāre dostoñ meñ bā-vafā ik ġham nikaltā hai