Tags-Gham

kabhī bār-e-ġham-e-firāq utaar
tū ne mazdūr kar diyā ham ko

ġham-e-ḳhās par kabhī chup rahe
kabhī ro diye ġham-e-ām par

lab pe kabhī Thahartī nahīñ der tak hañsī
ġham mere dil ke dasht meñ ḳheme lagāte haiñ

ġham bahut mohtaram hai mere liye
kyuuñ na ho aap kī atā hai ye

ġham-e-zāt se mirī zindagī ġham-e-kā.enāt meñ Dhal ga.ī
kisī bazm-e-nāz meñ kho ke bhī mujhe kā.enāt se pyaar hai

ġham-e-maqsad-rasī tā naza.a aur ham
ab aa.ī maut baḳht-e-nā-rasā kī

maiñ us kī ḳhushbū meñ gum thā 'aḳhtar'
vo mere ġham ke hisāb meñ thā

rakkhā hai tire ġham ko hamesha tar-o-tāza
Tapkā lahū āñkhoñ se kabhī zaḳhm-e-jigar se

nashāt kā ruḳh-e-raushan dikhā ga.ī shab-e-ġham
duā ko haath uThāyā thā maiñ sahar ke liye

chhupā ke rakhtī huuñ har ġham ko laakh pardoñ meñ
fasīl-e-zabt se nāyāb haiñ mire aañsū

ġham se ham be-mazā nahīñ hote
lazzat-e-ġham ko chāshnī kahiye

kis qadar mahdūd kar detā hai ġham insān ko
ḳhatm kar detā hai har ummīd har imkān ko

ġham kī bārish ne bhī tere naqsh ko dhoyā nahīñ
tū ne mujh ko kho diyā maiñ ne tujhe khoyā nahīñ

jāntā huuñ ek aise shaḳhs ko maiñ bhī 'munīr'
ġham se patthar ho gayā lekin kabhī royā nahīñ

nafas nafas pe ye ehsās-e-ġham ye majbūrī
ḳhudā-gavāh qayāmat hai zindagī kyā hai

umr bhar jis ne zamāne kī masīhā.ī kī
ban sakā apne hī ġham maiñ na masīhā apnā

qaa.em hue diloñ ke abad-mauj rābte
ik jumbish-e-nazar meñ ġham-e-do-jahāñ gayā

bahr-e-ālam meñ sab haiñ dam-bhar ke
ġham hue maiñ huā habāb huā

dam rukā thā jis kī uljhan se mire siine meñ aah
phir vahī zulfeñ mire ġham meñ pareshāñ ho ga.iiñ

us kī shām-e-ġham pe sadqe ho mirī sub.h-e-hayāt
jis ke mātam meñ tirī zulfeñ pareshāñ ho ga.iiñ