Tags-Gham

dil ātish-e-ġham se taao khā kar
rāñge kī tarah pighal rahā hai

zahe-nasīb vo pursāñ haiñ ġham ke māroñ ke
mizāj arsh pe haiñ aaj dil-figāroñ ke

is qadar mahv na ho jaao ġham-e-duniyā meñ
saaf aks-e-ġham-e-jānāñ hai ḳhabar-dār raho

be-hisī ne jo kabhī fursat-e-ġham dī ham ko
ek sailāb-e-nahufta tah-e-mizhgāñ niklā

chārāgar ḳhatra-e-jāñ kahte the jis ko 'bāsir'
vahī ġham bā.is-e-ārām-e-rag-e-jāñ niklā

ābdīda hai ishrat-e-duniyā
kis qadar ġham haiñ be-navā ke qarīb

apne zaḳhmoñ ko chhupāo kisī unvān 'samad'
rahguzāroñ meñ ġham-e-ābla paa.ī na rakho

kyuuñ dād-e-ġham hamīñ ne talab kī burā kiyā
ham se jahāñ meñ kushta-e-ġham aur kyā na the

tire lutf-o-karam kā mo'tarif hai ik jahāñ lekin
kisī majbūr-e-ġham kī dāstāñ kuchh aur kahtī hai

ġham-hā-e-zindagī se na thā umr bhar farāġh
ab kuchh to zindagī ko sañvar jaanā chāhiye

koī dil kī niklī na aarzū huā ranj-o-ġham se jigar lahū
phire ḳhaak chhānte kū-ba-kū na to sabr hai na qarār hai

vo ḳhushī dikhā.ī na charḳh ne ki evaz meñ jis ke na ġham diye
kabhī farsh-e-gul hai jo ek shab to mahīnoñ bistar-e-ḳhār hai

apnī taḳhlīq se hotī hai mohabbat sab ko
sochtā huuñ ki zarā bhī ġham-e-fardā na karūñ

ġham kī is sil ko kabhī bhī na samajh pā.egī
tū mire dil ko kabhī bhī na samajh pā.egī

pīTūñ huuñ kis ke ġham meñ sar o siina maiñ ki aaj
ho hai ye shash-jihat se taqāzā ki haañ ba-josh

kisī kī ruuh pyāsī rah na jaa.e
lihāzā ġham baraste hai jahāñ par

phir se ek mohabbat bhī kī jā saktī hai
tere ġham se haath chhuḌāyā jā saktā hai

parda-e-sāz meñ bhī soz kā hāmil honā
sham.a se siikh sharīk-e-ġham-e-mahfil honā

ishq phir ishq hai jis ruup meñ jis bhes meñ ho
ishrat-e-vasl bane yā ġham-e-hijrāñ ho jaa.e

tum kah rahe ho hijr meñ martā nahīñ koī
phir kyoñ ġham-e-judā.ī meñ vo hañs mar gayā