Tags-Gham

ġham se bhīge hue naġhmāt kahāñ se lā.ūñ
dard meñ Duubī huī baat kahāñ se lā.ūñ

mujhe charāġhoñ ke bujhne kā ġham to hai lekin
mirā zamīr hai zinda tujhe havā likh kar

jannat sī koī chiiz ho ġham kā muāvza
be-shak sukūñ yahāñ na ho lekin vahāñ to ho

ik kaifiyat-e-rāz hai ġham hai na masarrat
is bazm-e-mohabbat meñ samāñ aur hī kuchh hai

kyā jāniye kyā ġham thā mil kar bhī ye aalam thā
be-ḳhvāb rahe vo bhī ham ko bhī na niiñd aa.ī

ishq pahle bhī kiyā hijr kā ġham bhī dekhā
itne taḌpe haiñ na ghabrā.e na tarse pahle

ġham-e-hayāt kī pahnā.iyoñ se ḳhauf-zada
maiñ umr bhar rahā nākāmiyoñ se ḳhauf-zada

vo nazar nazar nahīñ hai na ho jis meñ aks terā
koī dil hai vo bhī jis meñ ġham-e-āshiqī nahīñ hai

mire dil ke daaġh tū hī zarā aur lau baḌhā de
shab-e-ġham hai tiira tiira kahīñ raushnī nahīñ hai

mujhe sāqī-e-chashm-e-yār ne ajab ek jaam pilā diyā
ki nashe ne jis ke ġham-e-jahāñ mire dil se saaf bhulā diyā

un kī mahfil ke tasavvur ne phir un kī yaad ne
mere ġham-ḳhāna kī raunaq ko do-bālā kar diyā

kis jagah aayā hai tū ā.ankhoñ ke nīlam bhuul kar
ġham kahāñ iqbāl-'sājid' kī nishānī ho ga.ī

nigāh-e-muntazir kab tak karegī ā.īña-bandī
kahīñ to dasht-e-ġham meñ yaar kā mahmil Thahar jaa.e

āñsuoñ meñ faqat ab mujh ko nazar aate ho
is tarah to mujhe ġham-kosh na kar denā thā

hazāroñ shīsha-e-dil koh-e-ġham pe ai 'tanvīr'
mudām toḌe hai charḳh-e-kuhan taḌāq-paḌāq

rahā hai tū hī to ġham-ḳhvār ai dil-e-ġham-ghīñ
tire sivā ġham-e-furqat kahūñ to kis se kahūñ

har nafas ziist guzar jaane kā ġham taarī hai
maut kā ḳhauf bhī ik ruuh kī bīmārī hai

kuchh is andāz se us ne ġham-e-furqat baḳhshā
jaise ye bhī koī in.ām-e-vafādārī hai

ġham-e-ḳhāmosh ko be-vaj.h tasallī denā
dil-navāzī kī ye sūrat bhī dil-āzārī hai

yaar ġham-e-hastī kā hai tazkira lā-hāsil
majbūr kā jiinā hī ik baar uThānā hai