Tags-Ghar

patthar ke jism meñ tujhe itnā kiyā talāsh
'mansūr' Dher lag ga.e ghar meñ kabāḌ ke

chhoḌ kar jā.ūñgā maiñ ghar meñ ujāle kā subūt
kaam aa.egā ye tāqoñ kā dhuāñ mere ba.ad

duniyā ke hādsāt se bhī rakh tū vāsta
hālāt ghar ke kaise haiñ is kī ḳhabar bhī rakh

dānoñ ke vāste tū zamīñ par bhī aa 'azīz'
har-chand āsmānoñ pe tū apnā ghar bhī rakh

'mīr' ke ghar kī hālat dekh
mere ghar kā haal na pūchh

ghar meñ kuchh bhī nahīñ tārīk sī ḳhushbū ke sivā
kuchh chamaktā nahīñ ab ḳhauf ke jugnū ke sivā

us ke jaate hī ye kyā ho ga.ī ghar kī sūrat
na vo dīvār kī sūrat hai na dar kī sūrat

un ko 'hālī' bhī bulāte haiñ ghar apne mehmāñ
dekhnā aap kī aur aap ke ghar kī sūrat

aisī nāzuk thī ghar ke parindoñ se bhī ḳhauf khātī thī maiñ
ye kahāñ, kin darindoñ ke jañgal meñ pheñkā hai tanhā mujhe

ghar ke baare meñ yahī jaan sakā huuñ ab tak
jab bhī lauTo koī darvāza khulā hotā hai

muddat se hai ma.amūra-e-bāzār-e-ġharībāñ
ye shahr na thā jis meñ tire ghar ke sivā kuchh

jigar meñ dard lab par nāla-e-vahshat asar honā
ayaañ kartā hai ik rashk-e-parī kā dil meñ ghar honā

ham sharīf insāñ 'shabāb' is ghar meñ nā-mahfūz haiñ
is meñ darvāze to kam haiñ chor darvāze bahut

habs ke dinoñ meñ bhī ghar se kab nikalte haiñ
dā.ere ke andar hī rāste badalte haiñ

har koī apne ghar palaT gayā hai
mas.ala ḳhair se nimaT gayā hai

āsāñ bhī na hogā ghar meñ rahnā
taufīq-e-safar na mil sakegī

maiñ ne dekhā hai kahīñ ghir ke jab aa.e bādal
chīḳh uThe log ki ab khetiyāñ lahrā.eñgī

apne vaqt-e-javānī meñ ye shoḳh ḳhudā hī jaane 'nazīr'
kis kis kā zar lūTegī aur kis kis kā ghar ghālegī

sūraj se sharteñ rakhtā huuñ
ghar meñ charāġh nahīñ jaltā hai