Tags-Ghar

muḌ ke dekhūñ to ta.āqub meñ vahī saaya ho
bhuul jā.ūñ mire hamrāh koī ghar tak hai

koī us shaḳhs ko apnā nahīñ kahtā 'āzar'
apne ghar meñ bhī vo ġhairoñ kī tarah rahtā hai

sahar jo niklā maiñ apne ghar se to dekhā ik shoḳh husn vaalā
jhalak vo mukhḌe meñ us sanam ke ki jaise sūraj meñ ho ujālā

jo le liyā dil ko mere yaaro to us ne lī raah apne ghar kī
paḌā taḌaptā maiñ rah gayā vaañ zabāñ pe aah aur laboñ pe naala

tusā de milne nuuñ dil hai be-kal ehī o gallāñ nit ākhadā hai
sadā le mainūñ de apne ghar vich nahīñ to itthe asā de naal aa

butoñ ko dekh ke sab ne ḳhudā ko pahchānā
ḳhudā ke ghar to koī banda-e-ḳhudā na gayā

makīñ koī nahīñ hai ghar meñ lekin
kisī kī ruuh andar ro rahī hai

mohabbat ko koī ghar de ḳhudāyā
bechārī aaj dar-dar ro rahī hai

phirtā rahā galī galī terī talāsh meñ
ma.alūm tere ghar kā patā kyuuñ nahīñ huā

shelf par rakkhī kitābeñ sochtī haiñ raat din
ghar se daftar kā safar kitnā suhānā ho gayā

yaad aatī jab kabhī ehsās kī nīlam-parī
ghar ke kaale dev kā qissa purānā ho gayā

ghar bhar ko ye tāqcha mubārak
ḳhud chal ke charāġh aa rahā hai

ye vaqt kā ḳhaas aadmī thā
be-vaqt jo ghar ko jā rahā hai

ḳhuun mazdūr kā miltā jo na ta.amīroñ meñ
na havelī na mahal aur na koī ghar hotā

terā ghar aur merā jañgal bhīgtā hai saath saath
aisī barsāteñ ki bādal bhīgtā hai saath saath

ghar se nikle the hausla kar ke
lauT aa.e ḳhudā ḳhudā kar ke

hasīn yādoñ ke chāñd ko alvidā.a kah kar
maiñ apne ghar ke añdhere kamroñ meñ lauT aayā

uTh ke 'tanvīr' ke pahlū se na jaanā ghar ko
dopahar raat sitamgār abhī baaqī hai

āsmānoñ pe tū rahā ḳhāmosh
ghar gayā tere naam par merā

dasht-o-sahrā ujaaḌ aayā huuñ
DhūñDhtā huuñ kahāñ hai ghar merā