Tags-Ghar

tāqoñ meñ charāġhoñ kā dhuāñ jam sā gayā hai
ab ham bhī nikalte nahīñ ujḌe hue ghar se

kyuuñ kāġhzī phūloñ se sajātā nahīñ ghar ko
is daur ko shikva hai mire zauq-e-hunar se

log bhopal kī tārīf kiyā karte haiñ
is nagar meñ to tire ghar ke sivā kuchh bhī nahīñ

sar pe ik sā.ebāñ thā bosīda
aur ghar bārishoñ kī zad meñ thā

na ham vahshat meñ apne ghar se nikle
na sahrā apnī vīrānī se niklā

roknā ghar tujhe jaane se ba-ḳhauf-e-hijrāñ
jāguzīñ dil meñ tire yaad azīzāñ ai dost

jā.eza jab mere ghar kā lene vo aa.e 'jamāl'
TuuTī phūTī hāñDiyāñ bhī khankhanā dī jā.eñgī

is band ghar meñ kaise kahūñ kyā tilism hai
khole the jitne qufl vo hoñToñ pe paḌ ga.e

ek shai thī ki jo paikar meñ nahīñ hai apne
jis ko dete ho sadā ghar meñ nahīñ hai apne

dasht se maiñ jo apne ghar aayā
mere dil meñ ḳhudā utar aayā

mile to kaash mirā haath thaam kar le jaa.e
vo apne ghar na sahī mujh ko mere ghar le jaa.e

tum aisā karnā ki koī jugnū koī sitāra sambhāl rakhnā
mire añdheroñ kī fikr chhoḌo bas apne ghar kā ḳhayāl rakhnā

bichhaḌne vaale ne vaqt-e-ruḳhsat kuchh is nazar se palaT ke dekhā
ki jaise vo bhī ye kah rahā ho tum apne ghar kā ḳhayāl rakhnā

dil zarā bhī na pasījā but-e-kāfir terā
ka.aba allāh kā ghar ban gayā but-ḳhāne se

aisā nahīñ ġharīb koī ghar-ba-ghar ki ham
aisā nahīñ ḳharāb koī dar-ba-dar ki ham

vo tez harf jo pheñkā guzarne vaale ne
uThā liyā hai use ghar meñ Darne vaale ne

tire ehsās kī īñTeñ lagī haiñ is imārat meñ
hamārā ghar tire ghar se kabhī ūñchā nahīñ hogā

yaaro ghar aa.ī shaam chalo mai-kade chaleñ
yaad aa rahe haiñ jaam chalo mai-kade chaleñ

shahr ke ābād sannāToñ kī vahshat dekh kar
dil ko jaane kyā huā maiñ shaam se ghar aa gayā

ishq kā ek ghar hamārā hai
baaqī sārā-jahāñ tumhārā hai