Tags-Ghar

qabr kā konā ho maskan dam nikal jaa.e 'rashīd'
ḳhāna-e-tan gir chuke jaldī ki apnā ghar bane

ye na aane ke bahāne haiñ sabhī varna miyāñ
itnā to ghar se mire kuchh nahīñ ghar duur tirā

thī mashvarat kī ham ko basānā hai ghar nayā
dil ne kahā ki mere dar-o-bām Dhā.iye

jo hālatoñ kā daur thā vo to guzar gayā
dil ko jalā chuke haiñ so ab ghar jalā.iye

mausam-e-gul kī rānā.ī ne dasht meñ Dere Daale haiñ
tum bhī 'ravish' ab ghar se niklo rut aa.ī hai bahāroñ kī

dil mirā ḳhvāb-gāh-e-dilbar hai
bas yahī ek sone kā ghar hai

tere va.adoñ ne hameñ ghar se nikalne na diyā
log mausam kā maza le ga.e barsātoñ meñ

ḳhvāboñ kī haqīqat bhī batā kyuuñ nahīñ dete
vo ret kā ghar hai to girā kyuuñ nahīñ dete

ghar se niklūñ to bhare shahr ke hañgāme haiñ
maiñ vo majbūr tirī yaad meñ ro bhī na sakūñ

be-gharī ab mirā muqaddar hai
ishq ne kar liyā hai ghar mujh meñ

band paḌe haiñ shahar ke saare darvāze
ye kaisā aaseb ab ghar ghar lagtā hai

rañg meñ haiñ saare ghar vaale khanak rahe haiñ chaa.e ke pyāle
duniyā jaag chukī hai lekin apnā saverā nahīñ huā hai

ThanDā ho kalejā mirā is āh-e-sahar se
jab dil kī tarah jalne lage ġhair kā ghar bhī

jis ke ghar jaatā hai vo daarū piye
ho hai us ghar ke dar-o-dīvār mast

mujhe rahne ko vo milā hai ghar ki jo āfatoñ kī hai rahguzar
tumheñ ḳhāksāroñ kī kyā ḳhabar kabhī nīche utre ho baam se

ham meñ jo shaḳhs hai us se nahīñ bantī apnī
ab to rahne ke liye aur koī ghar dekheñ

maiñ ne darvāza na rakkhā thā ki Dartā thā magar
ghar kā sarmāya vo dīvāreñ girā kar le gayā

kunjiyāñ ḳhāna-e-ham-sāya kī rakhte kyuuñ ho
apne jab ghar kī hifāzat nahīñ kī jā saktī

ham ki jūyā-e-ālam-e-nau the
ghar ko lauTe kahāñ kahāñ ho ke

ḳhushbū kā qāfila ye bahāroñ kā silsila
pahuñchā hai shahr tak to mire ghar bhī aa.egā