Tags-Ghar

terī galī se chhuT ke na jā-e-amāñ milī
ab ke to merā ghar bhī mirā ghar na ho sakā

kaise in sachche jazboñ kī ab us tak tafhīm karūñ
rūThne vaalā ghar aa.e to lafzoñ meñ tarmīm karūñ

tujh se bichhaḌnā qismat meñ thā jiinā to majbūrī hai
soch rahā huuñ ujḌe ghar kī phir se na.ī tāzīm karūñ

amānat mohtasib ke ghar sharāb-e-arġhavāñ rakh dī
to ye samjho ki buniyād-e-ḳharābāt-e-muġhāñ rakh dī

jaatā hai mire ghar se dil-dār ḳhudā-hāfiz
hai zindagī ab mushkil be-yār ḳhudā-hāfiz

barq-e-zamāna duur thī lekin mish.al-e-ḳhāna duur na thī
ham to 'zahīr' apne hī ghar kī aag meñ jal kar ḳhaak hue

mulk to mulk gharoñ par bhī hai qabza us kā
ab to ghar bhī nahīñ chalte haiñ siyāsat ke baġhair

ghar meñ lagtā nahīñ hai jī merā
dasht meñ rah gayā mirā sāmān

maiñ abr-o-bād se tūfāñ se sab se Dartā huuñ
ġharīb-e-shahr huuñ kāġhaz ke ghar meñ rahtā huuñ

dosto tum ne jo pheñke the mire āñgan meñ
lag ga.e ghar kī fasīloñ meñ vo patthar saare

maiñ chhup kar ghar meñ aanā chāhtā huuñ
lagī hai kis galī meñ ghaat likhnā

kyā mileñ 'talḳh' kisī se kabhī aate jaate
ghar kī chaukhaT pe qadam rakh ke palaT bhī jaa.eñ

ujḌe ghar ke āñgan meñ
harī-bharī phulvārī likh

vo aks ban ke mirī chashm-e-tar meñ rahtā hai
ajiib shaḳhs hai paanī ke ghar meñ rahtā hai

duniyā bahut qarīb se uTh kar chalī ga.ī
baiThā maiñ apne ghar meñ akelā hī rah gayā

apnā ghar chhoḌ kar bastiyāñ chhoḌ kar
be-amāñ ho ga.e ham amaañ chhoḌ kar

yaad kī ai sailī dīvāro ab ke aisā lagtā hai
haal kī tuġhyānī meñ jaise maazī kā ghar Duub gayā

aao ab chal kar zarā ghar meñ jalāte haiñ charāġh
chādar-e-zulmat utarne ko hai so vāpas chalo

zulmat-e-shām-e-alam kam karne
apne hī ghar meñ aag lagā dī

hai naqsh-e-diram jo naqsh-e-pā hai
aap aate to ghar diram-sirā hai