Tags-Ghar

vo ghar banā ke bahāroñ kā lutf lete haiñ
jo tinkā tinkā jama.a karte haiñ ḳhizāoñ meñ

aisī ḳhushiyāñ to kitāboñ meñ mileñgī shāyad
ḳhatm ab ghar kā tasavvur hai makāñ baaqī hai

tū kahīñ aur basā hai to ye ghar kaisā hai
lā-makāñ vaale ye mehrāb ye dar kaisā hai

nanhe ġhunchoñ se khilā rahtā hai āñgan dil kā
yuuñ mahaktī huuñ ki ghar-bār se ḳhushbū aa.e

us ko sukūn chāhiye jiine ke vāste
rahtā hai aur apnā hī ghar dekhtā nahīñ

kapḌe sī sī ke ghar chalātī hai
hai vo kambaḳht kitnī nar miTTī

dīda-e-tar meñ kaun rahegā
Dūbte ghar meñ kaun rahegā

ghar ko kaisā bhī tum sajā rakhnā
kahīñ ġham kā bhī dāḳhila rakhnā

shīsha-o-jām-o-subū bhar le mai-e-gul-rañg se
aaj saaqī ghir ke aa.ī hai ghaTā achchhī tarah

shikāyat aaj bhī tum se nahīñ ki mahrūmī
tumhāre dar se na miltī to ghar se mil jaatī

aaj hī mere ''attorney'' kā bhī phone aayā hai
aaj hī ghar kā kirāya bhī chukānā hai mujhe

kitne hī faisle kiye par kahāñ ruk sakā huuñ maiñ
aaj bhī apne vaqt par ghar se nikal paḌā huuñ maiñ

kuchh to ho jaatī tasallī dil-e-pazhmurda ko
ghar kī vīrānī jo sāmān-e-tamāshā hotī

ghar meñ faaqa thā jis jis ke chehre par
ghar se niklā to shaan se niklā

saath thā rañj-e-ḳhush-dilī 'āzar'
raat jab apne ghar gayā koī

umr ghar meñ to us kī kam guzrī
aur ziyāda kaTī hai saḌkoñ par

lagī aag mere jigar meñ yuuñ na lage kisī ke bhī ghar meñ yuuñ
na to lau uThī na chamak huī na sharar uḌe na dhuāñ uThā

hasīn rut hai magar kaun ghar se niklegā
har ik badan meñ samāyā huā hai Dar ab ke

hasad-o-hirs-o-havas aise ka.ī chor mile
maiñ ne chup-chāp kabhī apnā jo ghar kholā hai