Tags-Ghar

but bhī rakkhe haiñ namāzeñ bhī adā hotī haiñ
dil merā dil nahīñ allāh kā ghar lagtā hai

tum mire ghar jo shab basar karte
raat bhar jashn bām-o-dar karte

tishnagi-e-lab pe ham aks-e-āb likkheñge
jin kā ghar nahīñ koī ghar ke ḳhvāb likheñge

hirz-e-jāñ samajhte haiñ ham vatan kī miTTī ko
apne ghar ke ḳhāroñ ko ham gulāb likkheñge

maiñ Tiile pe baiThā to sunī shahr kī siskī
dekhe mire āñgan mire ghar shaam se pahle

mirī zamīñ pe lagī aap ke nagar meñ lagī
lagī hai aag jahāñ bhī kisī ke ghar meñ lagī

tum saath ho to ham bhī bayābāñ ko ghar kareñ
ye saḳht dhuup sāya-e-dīvār sī lage

rahī hai yuuñ hī nadāmat mujhe muqaddar se
guzar rahī hai sabā jis tarah mire ghar se

rahoge thāme yūñhī ye chaukhaT agarche ik bhī nazar na Dālūñ
hañsāo mat ghar ko lauT jaao ye raag mere sune hue haiñ

dhuup baTorā karte the ham saarā din
shaam ko baañT ke ghar le jaayā karte the

tumhārā daur thā ghar meñ bahār hañstī thī
abhī to dar pe faqat ranj-o-ġham kī dastak hai

baḌe sukūn se tum so ga.e vahāñ jā kar
ye kaise niiñd tumheñ aa ga.ī na.e ghar meñ

ghar meñ taaza havā.eñ ā.eñgī
zehan meñ khiḌkiyāñ banā lī haiñ

muqīm-e-dil haiñ vo armān jo puure nahīñ hote
ye vo ābād ghar hai jis kī vīrānī nahīñ jaatī

tanhā kamre suunā āñgan raat udaas
phir bhī ghar meñ sargoshī sī suntā huuñ

shujā.at kī misāleñ qabr ke patthar meñ rakkhī haiñ
hamārī saarī shamshīreñ ajā.ib ghar meñ rakkhī haiñ

ham apnā sāz-o-sāmāñ le to aa.e haiñ na.e ghar meñ
magar kuchh dastakeñ ab bhī purāne ghar meñ rakkhī haiñ

dair-o-ka.aba meñ tafāvut ḳhalq ke nazdīk hai
shāhid-e-ma.anī kā har sūrat hai ghar donoñ taraf

thī kahāñ jur.at kisī meñ haañ magar us ne kiyā
dil ke is ḳhālī makāñ ko aaj ghar us ne kiyā

ek nayā dar ek nayā ghar ek nayā hañgāma hai
ek na.e rahzan ke ghar ik nayā musāfir laa.ī raat