Tags-Ghar

chāñd banñā tumheñ mubārak ho
ghar hamārā karoge kab raushan

ho amn yahāñ ham meñ sochā thā magar 'az.har'
dekhā to har ik ghar se shamshīr nikaltī hai

aaj bhī gaañv meñ kuchh kachche makānoñ vaale
ghar meñ ham-sā.e ke faaqa nahīñ hone dete

jism kā ghar hī girā hai to na jaañ Thahregī
yaad aa.ī bhī kisī kī to kahāñ Thahregī

bhiiḌ ne yūñhī rahbar maan liyā hai varna
apne alāva kis ko ghar pahuñchāyā ham ne

ghar se nikle chauk ga.e phir park meñ baiThe
tanhā.ī ko jagah jagah bikhrāyā ham ne

nashsha-e-sahrā-navardī meñ tujhe kab hosh thā
tujh ko shahr-e-gul kā ik ik ghar sadā detā rahā

yuuñ apnī zaat ke dar par khaḌe ho kab se tum
ki apne ghar bhī hai āvāz de ke jaanā kyā

jañgal kī yā bāzāroñ kī dhuul uḌī hai svāgat ko
ham ne ghar ke bāhar jab bhī apne paañv nikāle haiñ

ghar ke dukhḌe shahr ke ġham aur des bides kī chintā.eñ
in meñ kuchh āvāra kutte haiñ kuchh ham ne paale haiñ

tanhā.ī ta.amīr karegī ghar se behtar ik zindān
bām-o-dar nahīñ hoñge lekin hogā jiine kā sāmān

kabhī to shahīdoñ kī qabroñ pe aao
ye sab ghar tumhāre basā.e hue haiñ

aadmī kam-go hai aur ghar se nikaltā bhī nahīñ
shahr meñ phir bhī 'munavār' kis qadar mash.hūr hai

aur bhī yāroñ se kahnā vaqt pe sab aa mileñ
mere ghar ke sahn meñ ik ḳhvāb kī tadfīn hai

dil toḌne vaale ye tujhe kuchh bhī ḳhabar hai
allāh kā ghar hai are allāh kā ghar hai

lafz rañgoñ meñ nahā.e hue ghar meñ aa.e
terī āvāz kī tasvīr meñ masrūf thā maiñ

dohrā rahā huuñ baat purānī kahī huī
tasvīr tere ghar meñ thī merī lagī huī

lagtā hai jaise ghar meñ nahīñ huuñ maiñ qaid huuñ
miltī haiñ roTiyāñ bhī jahāñ par ginī huī

kaisā kaisā dar pas-e-dīvār karnā paḌ gayā
ghar ke andar aur ghar tayyār karnā paḌ gayā

ik zarā sā rāsta māñgā thā vīrānī ne kyā
apnā saarā ghar hameñ mismār karnā paḌ gayā