Tags-Ghar

ai sanam bahr-e-ḳhudā aap hī laa.eñ tashrīf
putliyoñ kā hai tamāshā mire ghar aaj kī raat

mehmāñ aap bas itnā hī raheñ mere ghar
kal kā roz aaj kā din chaar pahar aaj kī raat

raqs is zohra-jabīñ kā hai adū ke ghar meñ
mehr mīzāñ meñ hai aqrab meñ qamar aaj kī raat

ab maiñ kahāñ visāl kā paudā lagā.uñgī
ye ghar to bhar gayā hai udāsī kī bel se

kahīñ ḳhulūs kahīñ dostī kahīñ pe vafā
baḌe qarīne se ghar ko sajā ke rakhte haiñ

jāntā thā paḌe raheñge vahīñ
is liye yaar ghar batā na sakā

ye kis ne aa ke shahr kā naqsha badal diyā
dekhā hai jis kisī ko vo be-ghar lagā mujhe

raam ban-bās se jab lauT ke ghar meñ aa.e
yaad jañgal bahut aayā jo nagar meñ aa.e

banī thī kursī jo ik head-master ke liye
janāb-e-head use le ga.e haiñ ghar ke liye

mabādā lauT ke aa.uuñ koī na pahchāne
nikalne ghar se ye 'sajjād' Dar nahīñ detā

bayān-e-tamannā sunā aur sun kar baḌī der se ġhaur farmā rahe haiñ
na ā.eñge yā mere ghar aa ga.e vo jo honā ho irshād ho jaa.e jhaT-paT

banā ġhairat-e-ā.īna dil hamārā ġhubār aa.e kyuuñ kar kudūrat rahe kyā
masal hai vo ḳhas-kam jahāñ paak vaalī na is ghar meñ kuuḌā na us ghar meñ karkaT

kabhī baraste the la.al-o-guhar isī ghar meñ
isī makāñ se magar kāsa-e-gadā niklā

apne mehmān ko palkoñ pe biThā letī hai
muflisī jāntī hai ghar maiñ bichhaunā kam hai

agar ghar ko chhoḌeñ to jaa.eñ kahāñ
qayāmat to khiḌkī se bāhar bhī hai

itnī sardī hai ki maiñ bāñhoñ kī harārat māñgūñ
rut ye mauzūñ hai kahāñ ghar se nikalne ke liye

kyuuñ na ho terī mohabbat se munavvar jaan o dil
sham.a jab raushan huī ghar meñ ujālā kar diyā

vīrāniyoñ ke ghar meñ mirā dam hī ghuT na jaa.e
aa ai ḳhayāl-e-yār tujhe saath le chaleñ

kuchh bekasoñ ke ghar jale kuchh be-dayār haiñ
un ke huzūr ashkoñ kī barsāt le chaleñ

ḳhuuñ kā sailāb thā jo sar se abhī guzrā hai
bām-o-dar ab bhī sisakte haiñ magar ghar chup haiñ