Tags-Ghar

mish.aleñ ġham kī farozāñ thiiñ har ik ghar meñ 'salīm'
kis kī dahlīz pe ham dard ke maare jaate

hai bas-ki ḳhaak uḌāne kī āvārgī ko kho
raḳht-e-safar meñ ghar ko bhī bāñdhe phirā karo

ghar ke sab darvāze kyuuñ dīvār hue haiñ
ghar se bāhar duniyā saarī chīḳh rahī hai

ḳhudā hī jaane ye dil kab ḳhudā kā ghar hogā
abhī to is meñ butān-e-havas kā Derā hai

na sā.ebān na āñgan na chhat na raushan-dān
aur is pe sab se laḌā.ī ki ghar ye merā hai

daftar meñ zehn ghar nigah rāste meñ paañv
jiine kī kāvishoñ meñ badan haath se gayā

qaid-e-dīvār-o-dar se jo mahfūz hai
aise ghar kī hameñ pāsbānī milī

har ghaḌī dil meñ rahā kartā hai yādoñ kā hujūm
ye vo ghar hai kabhī vīrān nahīñ hotā hai

umr-bhar ke liye aa jaao mire dil meñ raho
apne ghar meñ koī mehmān nahīñ hotā hai

buġhz adāvat dhoke-bāzī nafrat kā bāzār
log ajā.ib-ghar meñ rakh aa.e haiñ sachchā pyaar

tū ye na pūchh mire gaañv meñ haiñ ghar kitne
ye pūchh kaun se ghar meñ azaab kitne haiñ

ye kaisā shahr hai maiñ kis ajā.ib-ghar meñ rahtā huuñ
maiñ kis kī aañkh kā paanī huuñ kis patthar meñ rahtā huuñ

ab use apnī shabāhat bhī guzartī hai girāñ
ghar ke andar koī shīsha nahīñ rahne detā

zindābād ai dasht ke manzar zindābād
shahr meñ hai jaltā huā har ghar zindābād

jaan bachegī to pahuñcheñge dād-rasoñ ke ghar tak
galī galī meñ moḌ moḌ par Thag haiñ rasta ghere

vo jā apne pahlū meñ de hī ye mushkil
jo hogā bhī to dil meñ ghar hote hote

tamām shahr hī jis kī talāsh meñ gum thā
maiñ us ke ghar kā pata kis se pūchhtā yaaro

jo be-shumār diloñ kī nazar meñ rahtā thā
vo apne bachchoñ ko ik ghar na de sakā yaaro

fikr-e-ma.āsh ne sabhī jazboñ ko sard kar diyā
saḌkoñ pe din guzar gayā ho ke niDhāl ghar ga.e

atā huā thā jab yaqīñ kī sabz vādiyoñ meñ ghar
to kyuuñ dar-e-gumāñ pas-e-ḳhayāl de diyā gayā