Tags-Ghar

chāñd taare banā ke kāġhaz par
ḳhush hue ghar sajā ke kāġhaz par

ghar meñ kuchh kam hai ye ehsās bhī hotā hai 'salīm'
ye bhī khultā nahīñ kis shai kī kamī lagtī hai

dil ne kiyā hai qasd-e-safar ghar sameT lo
jaanā hai is dayār se manzar sameT lo

dil meñ hone lagā huzūr kā ghar
aap sāñche meñ Dhalte jaate haiñ

na jaane log Thaharte haiñ vaqt-e-shām kahāñ
hameñ to ghar meñ bhī rukne kā hauslā na huā

aql kahtī hai koī DhūñD mafar kī sūrat
dil ye kahtā hai badal jā.egī ghar kī sūrat

maiñ us ke liye hī sañvartā thā aur ḳhud ko sajāyā kartā thā
ab ḳhud ko sañvārūñ kis ke liye aur ghar ko sajā.ūñ kis ke liye

jab des meñ koī apnā thā pardes meñ kab jī lagtā thā
ab kis ke liye ghar yaad aa.e aur des ko jā.ūñ kis ke liye

vaise to bahut dhoyā gayā ghar kā añdherā
niklā nahīñ dīvār ke andar kā añdherā

sab tamāshe ho chuke ab ghar chalo
dīda-o-dil kho chuke ab ghar chalo

kar chuke sairāb ashkoñ se zamīñ
dard-dāna bo chuke ab ghar chalo

kar chuke Topī meñ jugnū ko asiir
saañp kā man kho chuke ab ghar chalo

ḳhvāhisheñ thak-hār ke ruḳhsat huiiñ
bojh saare Dho chuke ab ghar chalo

muntazir hogā koī dahlīz par
is sarā meñ so chuke ab ghar chalo

kāTne ko dauḌtā hai rāsta
ham-safar sab kho chuke ab ghar chalo

ik na.ī karvaT badal Daalo 'suhail'
sab hī pahlū so chuke ab ghar chalo

ghar se bāhar maiñ kisī se nahīñ milne jaatā
ik nagar soch meñ ābād kiyā hai maiñ ne

dilā taḌaph ke tū niklā paḌe hai siine se
ye ghar ujaaḌ na ai ghar base pakaḌ Tuk dhiir

jo bārishoñ se qabl apnā rizq ghar meñ bhar chukā
vo shahr-e-mor se na thā pa dūrbīñ balā kā thā

ghar se mujhe mat nikāl sun rakh
jāveñge to phir na āveñge ham