Tags-Ghar

un ke ghar aanā nahīñ jaanā nahīñ
muddateñ guzrīñ vo yārānā nahīñ

shāyad use zarūrat ho ab parde kī
raushniyāñ ghar kī maddham kar jā.ūñ maiñ

tinke bhī nahīñ chhoḌe haiñ 'nayyar' kisī ghar ke
sailāb vo aayā hai ki dekhā nahīñ jaatā

parda kyuuñ kartā hai 'nāzim' tire ghar aa.e the
raat ko ham ne unheñ bhes badalte dekhā

dekhte haiñ dar-o-dīvār harīfāna mujhe
itnā be-bas bhī kahāñ hogā koī ghar meñ kabhī

is tarah rahte haiñ is ghar ke makīñ
jis tarah bahrā sune gūñgā kahe

thā ye ghar bāb-e-duā misl-e-asar terā varūd
ab tujhe ai qadam-e-yār kahāñ se lā.ūñ

uTh ke kapḌe badal ghar se bāhar nikal jo huā so huā
raat ke ba.ad din aaj ke ba.ad kal jo huā so huā

maiñ kaise lauT ke jā.ūñgā apne ghar yaaro
ke mere qadmoñ se lipTī hai rahguzar yaaro

ushshāq kuuñ ruḳhsat kiyā de paañ ḳhirad kā yaar ne
rotā hai nis din 'mubtalā' ghar-bār kī saugand hai

rishte ke uljhe dhāgoñ ko dhīre dhīre khol rahī hai
biTiyā kuchh kuchh bol rahī hai puure ghar meñ Dol rahī hai

na shabistāñ hai na ab sham-e-shabistāñ koī
ghar kā ye haal hai jaise ho bayābāñ koī

ghar kā kyā zikr hai ham dil meñ uThā kar rakh leñ
ham ko mil jaa.e jo chhoTā sā bayābāñ koī

ab to apne jism ke saa.e se bhī lagtā hai Dar
ghar se bāhar bhī nikalnā ab to dūbhar ho gayā

haa.e vo ik ashk jis kī koī manzil hī nahīñ
haa.e vo ik be-zabāñ jo ghar se be-ghar ho gayā

maiñ thak gayā huuñ ḳhaak bayābāñ kī chhān kar
mauj-e-nasīm tū hī mirā ghar talāsh kar

chalā hai ghar ko dīvāna uḌā kar ḳhaak sahrā kī
ġhubār-e-ḳhātir-e-ahbāb kāshāne meñ rakh denā

shādī-o-ġham par kareñ kyā tabsira
tere mere sab ke ghar kī baat hai

bārish huī to ghar ke darīche se lag ke ham
chup-chāp sogvār tumheñ sochte rahe

'hasn-jamīl' tirā ghar agar zamīn pe hai
to phir ye kis liye gum āsmān meñ tū hai