Tags-Ghar

terā jaanā thā ki ġham-ḳhāne pe vahshat chhā ga.ī
maiñ ye samjhā thā mire ghar se bayābāñ duur hai

makḌī ke jāloñ meñ kab se qaid haiñ raushan-dān mire
haa.e kyā socheñge ghar ko dekh ke kal mehmān mire

is kī baat kā paañv na sar
phir bhī charchā hai ghar ghar

biivī akelī Dartī hai
shaam huī ab chaliye ghar

isī tarah dar-o-dīvār tañg hote rahe
to koī apne liye ghar nahīñ bānegā

maiñ apnī niiñd kisī ghar meñ kaise bhuul aatā
vo mere ḳhvāb ke sāñche meñ Dhal gayā hotā

kareñ hijrat to ḳhāk-e-shahr bhī juz-dān meñ rakh leñ
chaleñ ghar se to ghar kyā yaad bhī sāmān meñ rakh leñ

vo aa.e ghar meñ hamāre ḳhudā kī qudrat hai
kabhī ham un ko kabhī apne ghar ko dekhte haiñ

hai mirī ḳhāna-nashīnī se ye ghar ghar mazkūr
ḳhail-e-ushshāq kā sarkūb kahīñ baiTh rahā

ḳhush bahut phirte haiñ vo ghar meñ tamāshā kar ke
kaam niklā to hai un kā mujhe rusvā kar ke

mujhe ḳhabar thī mirā intizār ghar meñ rahā
ye hādsa thā ki maiñ umr bhar safar meñ rahā

ḳhush-hāl ghar sharīf tabī.at sabhī kā dost
vo shaḳhs thā ziyāda magar aadmī thā kam

ghar se niklā na tū aur muntziroñ ne tere
dar pe naale kiye yaañ tak ki gale baiTh ga.e

nā-tavāñ ham hue yaañ tak ki tirī mahfil tak
ghar se aate hue sau baar chale baiTh ga.e

ashk aur aah kī shiddat na thamī garche 'baqā'
ghar ke ghar is meñ hazāroñ ke jale baiTh ga.e

raat kī tanhā.ī meñ jab bhī ghar se niklūñ
us kī yādoñ ko maiñ jugnū kar letā huuñ

ek dil hai ki nahīñ dard se dam bhar ḳhālī
varna kyā kyā nazar aa.e na bhare ghar ḳhālī

kisī ko merī zarūrat nahīñ so be-masraf
gaḌā huā huuñ kisī ghar meñ kiil kī sūrat

bāhar kā dhan aatā jaatā asal ḳhazāna ghar meñ hai
har dhuup meñ jo mujhe saayā de vo sachchā saayā ghar meñ hai

pātāl ke dukh vo kyā jāneñ jo sat.h pe haiñ milne vaale
haiñ ek havāla dost mire aur ek havāla ghar meñ hai