Tags-Ghar

mirī umr ke ik ik lamhe ko maiñ ne qaid kiyā hai lafzoñ meñ
jo haarā huuñ yā jiitā huuñ vo sab sarmāya ghar meñ hai

tū nanhā-munnā ek diyā maiñ ek samundar añdhiyārā
tū jalte jalte bujhne lagā aur phir bhī añdherā ghar meñ hai

kyā svāñg bhare roTī ke liye izzat ke liye shohrat ke liye
suno shaam huī ab ghar ko chalo koī shaḳhs akelā ghar meñ hai

ik hijr-zada bābul piyārī tire jāgte bachchoñ se haarī
ai shā.er kis duniyā meñ hai tū tirī tanhā duniyā ghar meñ hai

duniyā meñ khapā.e saal ka.ī āḳhir meñ khulā ahvāl yahī
vo ghar kā ho yā bāhar kā har dukh kā mudāvā ghar meñ hai

isī par ḳhush haiñ ki ik dūsre ke saath rahte haiñ
abhī tanhā.ī kā matlab nahīñ samjhe haiñ ghar vaale

jamtā hai apne zikr se ab mahfiloñ kā rañg
rahte haiñ apne ghar meñ magar jā-ba-jā haiñ ham

vo mauj-e-ḳhunuk shahr-e-sharar tak nahīñ aa.ī
dariyāoñ kī ḳhushbū mire ghar tak nahīñ aa.ī

sannāTe sajā.e ga.e gul-dānoñ meñ ghar ghar
kho.e hue phūloñ kī ḳhabar tak nahīñ aa.ī

kaam meñ hoñge saare ghar vaale
radio gungunā rahā hogā

maiñ apne ghar kī tabāhī sambhāl lūñgā magar
zamāne bhar kā mujhe sarbarāh likh liije

ka.ī mehr-o-mah utar aa.e the vo yahīñ the mere ghar aa.e the
vo kalī kalī se dar aa.e the vo chaman chaman se chale ga.e

judā thī baam se dīvār dar akelā thā
makīñ the ḳhud meñ magan aur ghar akelā thā

ghar se to nikal ki dar pe 'ehsān'
kyā ġham meñ ghirā huā khaḌā hai

vo ek sham ki ḳhud jal uThe haiñ ghar ke charāġh
vo ek sub.h ki ḳhud jis pe ro paḌī shabnam

agar kuchh bhī mire ghar se dam-e-ruḳhsat nikaltā hai
uThā le jaa.e jis kā jo mirī bābat nikaltā hai

koī asāsa paas nahīñ aur āñdhī har din kā māmūl
ham ne bhī kyā soch samajh kar be-dīvār kā ghar māñgā

ghar tere ga.e pe tujh kuuñ na paayā bilā raqīb
mujh ko huā ye gul ke evaz ḳhaar dekhnā

ye gile kī baat to hai magar mujhe us se koī gila nahīñ
jo ujaḌ gayā mirā ghar to kyā hai tumhārā ghar to bachā havā

ek hai andesha mujh ko kahīñ mere mar jaane ke ba.ad
bech na deñ mere ghar vaale mirī qīmtī ġhazleñ raddī meñ