Tags-Ghar

safar se aa.e to phir ik safar nasīb huā
ki umr-bhar ke liye kis ko ghar nasīb huā

har-sū basī huī thī magar DhūñDte kahāñ
ḳhushbū kā koī rañg na thā koī ghar na thā

sub.h se chalte chalte āḳhir shaam huī āvāra-e-dil
ab maiñ kis manzil meñ pahuñchā ab ghar kitnī duur rahā

ik terī āvāz nahīñ aatī varna
chhoTe se is ghar meñ har āsā.ish hai

kalīsā o haram o dair mohtaram lekin
inhīñ kī zad meñ kahīñ merā ghar bhī aatā hai

kyuuñ masāfat meñ na aa.e yaad apnā ghar mujhe
Thokareñ dene lage haiñ raah ke patthar mujhe

jis meñ āsūda rahā maiñ vo thā kāġhaz kā makāñ
ek hī jhoñkā havā kā kar gayā be-ghar mujhe

aa gayā thā maiñ sitam kī bastiyoñ ko rauñd kar
kyā ḳhabar thī ḳhud nigal jā.egā apnā ghar mujhe

tilismī haiñ na.e insāñ kī āñkheñ
ki ghar meñ rah ke duniyā dekhtā hai

kis tarah mire ghar vo 'hafīz' aa.eñ ki un ko
ġhairoñ kī mudārāt se fursat nahīñ miltī

maiñ apnā azm le kar manziloñ kī samt niklā thā
mashaqqat haath pe rakkhī thī qismat ghar pe rakkhī thī

vahī log haiñ vahī naam haiñ vahī ghar vahī dar-o-bām haiñ
magar ab darīchoñ kī oT se hameñ jhāñktā koī aur hai

bahut shauq ghar ko sajāne kā thā
magar kyā kareñ apnā ghar hī nahīñ

jī jalā.egā ye āvāra o be-dar honā
dil dukhā.eñge ye mahke hue ghar ab ke baras

sarhad-e-jism se bāhar kahīñ ghar likkhā thā
ruuh par apnī ḳhalāoñ kā safar likkhā thā

apne ghar meñ isī ehsās ne jiine na diyā
apne hāthoñ pe kisī aur kā ghar likkhā thā

peḌoñ kī tarah husn kī bārish meñ nahā luuñ
bādal kī tarah jhuum ke ghar aao kisī din

guzreñ jo mere ghar se to ruk jaa.eñ sitāre
is tarah mirī raat ko chamkāo kisī din

mujh ko kuchh dil par iḳhtiyār nahīñ
tumhīñ is ghar ke ab to sab kuchh ho

yā rab mirī duāoñ meñ itnā asar rahe
phūloñ bharā sadā mirī bahnā kā ghar rahe