Tags-Ghar

dard kī vaadī meñ aahoñ kā mohalla hai jahāñ
bas vahīñ pahlī saḌak par ek ghar merā bhī hai

chhup-chhup ke ab jo niklo to ma.alūm ho maza
kar dī hai maiñ ne aap ke ghar bhar ko ittilā.a

allāh ke ghar der hai andher nahīñ hai
tū yaas ke mausam meñ bhī ummīd kā fan siikh

ġham ke pīchhe maare maare phirnā kyā
ye daulat to ghar baiThe aa jaatī hai

nikal paḌe the yūñhī ham to ek din ghar se
kise ḳhabar thī ki yuuñ tum se sāmnā hogā

raat ham ik shā.er-e-āzam ke ghar milne ga.e
bā-dil-nāḳhvāsta khānā use chunñā paḌā

kahīñ se chāñd kahīñ se qutub-numā niklā
qadam jo ghar se nikālā to rāsta niklā

charāġh ghar meñ jalā chhoḌ kar ga.e the 'shakīl'
safar se lauTe to sab kuchh bujhā bujhā niklā

DhūñDte phirte haiñ saḌkoñ pe ujāle lekin
ghar meñ aatī huī tanvīr se Dar jaate haiñ

ghar se niklā huuñ to ab duur kahīñ jaane de
rok ai gardish-e-ayyām na rastā merā

phir kabhī tum se milūñgā rāsto!
lauT kar filhāl ghar jā.ūñgā maiñ

phir mirī ruuh mere ghar kā pata
mere saa.e se pūchhtī hogī

pare se dekho to sirf ḳhushbū qarīb jaao to ik nagar hai
tilismī rañgoñ se bhīgte ghar nisā.ī sāñsoñ se band galiyāñ

har ghar har mahfil us kī āvāz ke motī
bām-e-havā se barseñge

kabhī ga.e the miyāñ jo ḳhabar ke sahrā kī
vo aa.e bhī to bagūloñ ke saath ghar aa.e

jīvan bhar kā bandhan ham to ghar se toḌ ke nikle the
lekin kuchh an-jāne rishte pairoñ kī zanjīr hue

ghar jab banā liyā tire dar par kahe baġhair
jānegā ab bhī tū na mirā ghar kahe baġhair

bastiyāñ phūñknā jalānā ghar
kyā yahī aadmī kā hāmil hai

sunā hai ghar pe mirā muntazir nahīñ koī
so ab ke baar maiñ hargiz nahīñ sambhalne kā

muddat guzrī ek ibādat meñ fariyād guzārī thī
maiñ apnī hī zaat ke ghar meñ nā-jā.ez qabzoñ meñ huuñ