Tags-Ghar

ham vahshī the vahshat meñ bhī ghar se kabhī bāhar na rahe
jañgal jañgal phir bhī kitnā naam huā ham logoñ kā

mujhe aaj yuuñ un kī yaad aa hī hai
mire ghar vo jaise ḳhud aa.e hue haiñ

yaqīñ hī nahīñ aa rahā 'barq' mujh ko
mire ghar meñ vo aaj aa.e hue haiñ

satāyā aaj munāsib jagah pe bārish ne
isī bahāne Thahar jaa.eñ us kā ghar hai yahāñ

vo ham nahīñ haiñ ki sirf apne hī ghar meñ sham.eñ jalā ke baiTheñ
vahāñ vahāñ raushnī kareñge jahāñ jahāñ tīrgī milegī

maiñ har lamha is ghar se
jaane vaalā lagtā huuñ

hazāroñ ghar hue haiñ is se vīrāñ
rahe ābād sarkār-e-mohabbat

bastī ke saare log hī ātish-parast the
ghar jal rahā thā aur samundar qarīb thā

jahāñ ke bahr meñ har mauj buujh sail-e-fanā
banā na ghar ko tū ḳhāna-ḳharāb duniyā meñ

rone ne mire saikḌoñ ghar Dhā diye lekin
kyā raah tire kūche kī hamvār nikālī

dozaḳh o jannat haiñ ab merī nazar ke sāmne
ghar raqīboñ ne banāyā us ke ghar ke sāmne

dhīre dhīre Dhalte sūraj kā safar merā bhī hai
shaam batlātī hai mujh ko ek ghar merā bhī hai

ek pagDanDī chalī jañgal meñ bas ye soch kar
dasht ke us paar shāyad ek ghar merā bhī hai

ham to anjān the is ghar meñ hamārā kyā thā
tum to timsāl the duniyā meñ samajhdārī kī

apnoñ ko to nibāhane vaale hazār haiñ
insān ho to dil meñ adū ke bhī ghar karo

vahāñ bhī vahshateñ tanhā.iyāñ haiñ
zarā sahrā se vāpas ghar to jaao

phir kahīñ dil ke sivā un ko amaañ hī na milī
but nikāle ga.e allāh ke ghar se pahle

yuuñ aao mire pahlū meñ tum ghar se nikal kar
bū aatī hai jis tarah gul-e-tar se nikal kar

kahīñ log tanhā kahīñ ghar akele
kahāñ tak maiñ dekhūñ ye manzar akele

apnī galī meñ mujh ko na kar dafn bād-e-qatl
mere pate se ḳhalq ko kyuuñ terā ghar mile