Tags-Ghar

ye Thekedār imārat ke ye zamīñ vaale
gire jo ghar to bahut be-zabān lagte haiñ

mire dil ke akele ghar meñ 'rāhat'
udāsī jaane kab se rah rahī hai

un kī ye zid ki mire ghar meñ na aa.e koī
apnī hī haT ki mujhe ḳhud hī bulā.e koī

na to apne ghar meñ qarār hai na tirī galī meñ qayām hai
tirī zulf o ruḳh kā farefta kahīñ sub.h hai kahīñ shaam hai

na jaane kyuuñ dhueñ kī ik lakīr uThtī hai is ghar se
kahīñ malbe ke nīche dab gayā jaltā diyā koī

ghar ke darbānoñ ne saare ghar pe qabza kar liyā
ham ne āñkheñ kholne meñ kis qadar tāḳhīr kī

jism kī ret bhī muTThī se phisal jā.egī
maut jab ruuh liye ghar se nikal jā.egī

sahar huī to koī apne ghar meñ ruk na sakā
kisī ko yaad na aa.e diye jalā.e hue

raftār-e-roz-o-shab se kahāñ tak nibhā.ūñgā
thak-hār kar maiñ ghar kī taraf lauT jā.ūñgā

sar-phirī havāoñ meñ ghar se kyuuñ nikal aa.e
baj rahe haiñ darvāze sun rahe ho ab bolo

ghar khet gaa.e bail raqam ab kahāñ rahe
jo kuchh thā sab nikāl ke fasloñ meñ bhar diyā

shaam huī ab tū bhī shāyad
apne ghar ko lauTā hogā

ai shām-e-hijr-e-yār mirī tū gavāhī de
maiñ tere saath saath rahā ghar nahīñ gayā

chhīn kar 'shādāb' koī le gayā
ik anokhā sukh jo ghar-āñgan meñ thā

baḌī bisāñd hai ThiThurī huī havāoñ meñ
maiñ ghir gayā huuñ lahū chāTtī balāoñ meñ

jab tak tire visāl kī sūrat nahīñ koī
jī DhūñDhtā hai ghar koī donoñ jahāñ se duur

siskiyāñ gūñjtī haiñ kānoñ meñ
ghar kisī kā jalā hai phir shāyad

koī kapḌe pe buuTe kāḌhe koī phuul banā.e
koī apnā bālak paale koī ghar ko sajā.e

muntazir maañ jo khaḌī hai ki bahut der huī
mere ghar-bār kī raunaq nahīñ aayā ab tak

huā hai yuuñ bhī ki ik umr apne ghar na ga.e
ye jānte the koī raah dekhtā hogā