Tags-Ghar

ghar se niklegā vo apnī raat ko
mat nikaliye dekhiyo ai maah tū

ka.ī tabdīliyāñ hotī haiñ insānoñ kī bastī meñ
parinda koī dekhā hai jo apnā ghar badaltā hai

nikal mat ghar se tū ai ḳhāna-ābād
kiyā ab ham ne bhī vīrāna ābād

rahe us zulf se ye dil pareshāñ
tirā ghar hove yuuñ ai shāna ābād

thoḌī sī der mil ke bahut der ro liye
phir apne ghar ko maiñ ga.ī vo apne ghar gayā

patthar kī mūrtī banī maiñ dekhtī rahī
ghar pīchhe rah gayā thā vo aage guzar gayā

ḳhushiyoñ ke fasāne hī dohrā.e nahīñ jaate
haiñ rañj ke chhīñTe bhī ghar ghar kī kahānī meñ

ka.aba bhī ham ga.e na gayā par butoñ kā ishq
is dard kī ḳhudā ke bhī ghar meñ davā nahīñ

ġhairoñ ke ghar to shab ko jaate ho bārhā tum
bhūle se mere ghar bhī ik roz aa nikalnā

mar ke yaad aa.e maze duniyā ke
ghar se nikle the ki ghar yaad aayā

dekh lenā maat khā jā.egā shah pā kar ye TeḌhā chalne vaalā
chaal uljhī hai koī paidal jamā.e rakkho koī ghar nikālo

chalā vo daur-e-sitam ghar meñ chhup ke baiTh ga.e
jo har salīb ko mardāna-vār dekhte the

mil jaa.eñ azhdahām meñ ham hī ye ham se duur
ik ghar judā banā.eñge dair-o-haram se duur

jitne qadam zyāda hoñ utnā zyāda ajr
ghar barahman kā chāhiye bait-us-sanam se duur

sarāboñ ke safar se tū nahīñ lauTā 'fazā' ab tak
jo ḳhat likhnā to itnī baat us ke ghar pe likh denā

hamārī raat se behtar thī agle vaqt kī raat
har ek ghar meñ diyā sub.h tak to jaltā thā

ab ghaaT na ghar dahlīz na dar
ab paas rahā hai kyā baabā

maazī kī be-nām guphā meñ baiThe baiThe sochte haiñ
nagar-nagar hai shohrat apnī ghar-ghar apnā charchā hai

ḳhud ko paane kī chintā ne gyaan jagāyā duurī kā
ghar apnā hai shahr parāyā biich meñ lambā rastā hai

is ghar meñ bahut kam hai ab aamad o raft us kī
duniyā kī taraf ham ne dīvār uThā lī hai